न्युजर्सीमा ब्यापक अध्यागमन छापा, २४ देशका १०५ कागजपत्रविहिन पक्राउ
अमेरिकाको न्युजर्सीमा अमेरिकी इमिग्रेशन एण्ड कस्टम इन्फोर्समेन्टले मारेको ब्यापाक छापामा एकसय ५ जना कागजपत्रविहिनहरु पक्राउ परेका छन् । न्युजर्सीका महान्यायाधिवक्ताले कागजपत्रविहिन आप्रवासीका पक्षमा नयाँ नियम लागु गर्दै आइससँगको समन्वय कम गर्ने घोषणा गरे लगत्तै आइस आक्रमक बनेको हो ।
नोभेम्बरको अन्तिम साता न्युजर्सीका महान्यायाधिवक्ताले अमेरिकी अध्यागमन निकायलाई स्थानीय कानुन कार्यान्वय इकाईहरुले कागजपत्रविहिन आप्रवासीहरुका बारेमा प्रदान गर्ने सुचना र समन्वय कम गर्ने नियमको घोषणा गरेका थिए । आइसले त्यस्तो नियमको कडा भत्र्सना गर्दै न्युजर्सीमा आगामी दिनमा कागजपत्रविहिनहरुलाई नियन्त्रणमा लिने क्रम तीब्र पार्ने चेतावनी दिएको थियो ।
यस्तो चेतावनी लगत्तै आइसले न्युजर्सीमा छापामार्ने काम समेत तीब्र पारेको थियो । पाँचदिनसम्म मारेको छापामा पक्राउ पर्नेहरुमा नेपालीहरु भने छैनन् । ब्राजिल, क्यानडा, कोलम्बिया, मेक्सिको, ग्वाटेमाला, होण्डुरस लगायत २४ वटा देशका आप्रवासीहरु पक्राउ परेका छन् । पक्राउ पर्नेहरु १८ देखि ६५ बर्षसम्मका रहेको आइसले जनाएको छ ।
आइसले भने यो छापा पूर्व निर्धारित रहेको र नोभेम्बरको अन्तिम साता न्युजर्सीका महान्यायाधिवक्ताले आइससँगको समन्वय कम गर्नेगरी ल्याएको नियमको परिणाम नरहेको दावी गरेको छ । तर स्थानीय प्रहरी र जेलहरुले कागजपत्रविहिनहरुलाई आइससमक्ष रिफर नगरेमा भने छापालाई अझ तीब्र पार्ने आइसले चेतावनी दिएको छ ।
अप्रिलयता न्युजर्सीमा आइसको यो चौथो ठूलो छापा हो । अप्रिलयता आइसले न्युजर्सीमा ३ सय भन्दा धेरै कागजपत्रविहिनलाई पक्राउ गरिसकेको छ । जसमा अधिकांश अपराधमा संलग्नहरु रहेको आइसले जनाएको छ । न्युजर्सीमा ५ लाख भन्दा धेरै कागजपत्रविहिन आप्रवासीहरुको बसोबास रहेको अनुमान गरिएको छ ।
