न्युयोर्क सिटीमा ग्रिनकार्डका लागि ३४ महिनासम्म ! यस्तो छ ढिलाईको कारण
विगत २ बर्षदेखि अमेरिकामा ग्रिनकार्ड र नागरिकताका आवेदनहरुमा ढिलाई हुँदै गइरहेको छ । अमेरिकी सरकारले आवेदन दिएको तीनचार महिनाभित्रै ग्रिनकार्ड वा नागरिकता प्रदान गर्दै आएकोमा अहिले यो अवधि एकदेखि दुईबर्षसम्म पुगेको छ ।
न्युयोर्क सिटीमा अहिले ग्रिनकार्डका लागि १७ देखि ३४ महिनासम्म लाग्न थालेको छ । युएससीआईएसका अनुशार रोजगारमा आधारित ग्रिनकार्डका लागि न्युयोर्क सिटीमा १३ देखि २३ महिनासम्म लाग्न थालेको छ भने परिवारमा आधारित ग्रिनकार्डका लागि १७ देखि ३१ महिनासम्म लाग्न थालेको छ ।
त्यस्तै न्युयोर्क सिटीमा नागरिकता आवेदनका लागि ११ देखि २२ महिनासम्म लाग्ने गरेको छ ।
युएससीआईएसको कुन फिल्ड अफिस वा कुन सर्भिस सेन्टरमा कुन आवेदनका लागि कति समय लागिरहेको छ भन्ने चेक गर्न यहाँ क्लिक गर्नुहोला ।
यसरी लामो समय लाग्नुको कारण भने युएससीआईएसले कामको चाप भएको बताएको छ । युएससीआईएसका अनुशार विगत दुईबर्षमा कामको चाप २५ प्रतिशतले बढेको छ । खासगरी अमेरिकी नागरिकताका लागि दिने आवेदनको संख्या अहिले ह्वात्तै बढेको छ ।
आर्थिक बर्ष सन् २०१३ देखि १५ सम्ममा युएससीआईएसमा ७ लाख ७७ हजार नागरिकताका आवेदन परेकोमा आर्थिक बर्ष सन् २०१६ र १७ मा ९ लाख ७९ हजार नागरिकता आवेदन परेको युएससीआईएसले जनाएको छ ।
