युएससीआईएसमा ४३ प्रकारका आवेदनमा क्रेडिटकार्डबाट शुल्क तिर्न सकिने
प्रकाशित मिति : मंसिर २१, २०७५ शुक्रबार
के तपाईलाई थाहा छ ? अमेरिकी सरकारको युएससीआईएसमा दिइने कैयन आवेदनको शुल्क क्रेडिट कार्डबाट सहजै तिर्न सकिन्छ । यदि तपाईको आवेदन युएससीआईएसको लकबक्स फेसिलिटीमार्फत प्रकृयामा जाने खालको छ भने तपाईले आवेदन शुल्क र औंठाछाप शुल्क क्रेडिट कार्डबाट तिर्न सक्नुहुनेछ ।
युएससीआईएसले ४३ प्रकारका आवेदनहरु युएससीआईएसको लकबक्स फेसिलिटीमार्फत प्रकृयामा जाने व्यवस्था गरेको छ । जसमा आफन्तका लागि गरिने ग्रिनकार्ड आवेदन आई १३०, ट्राभल डकुमेन्ट आवेदन, ग्रिनकार्डको पुनस्थार्पन, टीपीएस आवेदन, नागरिकता आवेदन लगायत रहेका छन् ।
तपाईले भिसा, मास्टरकार्ड, अमेरिकन एक्सप्रेस र डिस्कभर कार्डमार्फत शुल्क तिर्न सक्नुहुनेछ । तर तिर्नु अगाडि तपाईको कार्डमा प्रयाप्त रकम भए नभएको जाँच गर्न जरुरी छ । कार्ड डिक्लाइन भएमा तपाईको आवेदन युएससीआईएसले अस्वीकृत गर्नेछ भने एकपटक कार्ड डिक्लाइन भएमा युएससीआईएसले अर्कोपटक प्रयास गर्दैन ।
क्रेडिट कार्डमार्फत शुल्क तिर्नका लागि जी १४५० नामको फर्म भरेर आवेदनको सबैभन्दा अगाडिको पेजमा राख्नुपर्छ ।
युएससीआईएसमा आवेदन पुगीसकेपछि युएससीआईएसले तोकिएको रकममात्र क्रेडिट कार्डबाट चार्ज गर्नेछ । त्यसपछि आवेदकको सुरक्षाको लागि क्रेडिट कार्डको विवरण भरिएको उक्त फर्म नष्ट गर्नेछ ।
क्रेडिट कार्डबाट शुल्क तिर्दा हरेक फर्मको लागि छुट्टा छुटटै जी १४५० भर्न आवश्यक छ । यद्यपी एउटा आवेदन शुल्क र औंठाछाप शुल्क भने एउटै जी १४५० मार्फत तिर्न सकिन्छ ।
याद राख्नुहोस्, यदि तपाईले धेरै आवेदनमा एउटामात्र जी १४५० फर्म भरेर पठाउनुभयो भने तपाईको आवेदन युएससीआईएसले अस्वीकार गर्नेछ । त्यस्तै एउटै आवेदनका लागि मर्न अर्डर, चेक र क्रेडिट कार्ड मिसाएर पठाएमा पनि आवेदन अस्वीकार गर्नेछ ।
यदि एउटा आवेदनका लागि दुईवटा क्रेडिटकार्डमार्फत शुल्क तिर्नुपर्ने भएमा दुई वटा जी १४५० फर्म भरेर कुन क्रेडिट कार्डबाट कति शुल्क तिर्न चाहेको हो खुलाएर पठाउनुपर्छ । कुनै आवेदन शुल्क ४ सय डर रहेमा एउटा कार्डबाट ३ सय र अर्कोबाट १ सय तिर्न सकिन्छ । तर दुईवटै कार्डको विवरण दुईवटा जी १४५० फर्मममा खुलाएर कुन कार्डबाट कति तिर्न चाहेको हो स्पष्ट पार्नुपर्छ ।
क्रेडिट कार्डबाट शुल्क तिर्दा समेत युएससीआईएसलाई अतिरिक्त रकम तिर्नुपर्दैन ।