बामदेव क्षेत्रीको पुस्तक लोकार्पण, समाजवादको नयाँ मोडलबारे बहसको सुरुवात - KHASOKHAS

बामदेव क्षेत्रीको पुस्तक लोकार्पण, समाजवादको नयाँ मोडलबारे बहसको सुरुवात

नेपाल कम्युनिष्ट पार्टीका केन्द्रीय सदस्य एवं लेखक बामदेव क्षेत्रीको नयाँ पुस्तक ‘नेपालको अर्थ राजनीति संभावना र चुनौती’ लोकार्पण गरिएको छ । पुस्तकले राज्य नियन्त्रित समाजवाद र प्रजातान्त्रिक समाजवाद नभई तेश्रो मोडलको समाजवादबारे बहसको सृजना गरेको छ ।

पुस्तकको लोकार्पण नेकपाका अध्यक्ष पुष्पकमल दाहाल प्रचण्ड र नेकपाका महासचिव बिष्णु पौडेलले काठमाडौंको प्रज्ञा प्रतिष्ठानमा आज आयोजित कार्यक्रममा गर्नुभयो । पुस्तकबारे त्रिभुवन विश्वविश्द्यालय मानविकी तथा सामाजिक शास्त्र सङ्कायका डीन प्रा डा शिवलाल भूसाल र त्रिविका प्राध्यापक डा सूर्य थापाले समीक्षा गर्नुभएको थियो ।

कार्यक्रममा बोल्दै नेकपा अध्यक्ष प्रचण्डले राज्य नियन्त्रित समाजवाद र प्रजातान्त्रिक समाजवाद स्खलन भएकाले तेश्रो मोडलको समाजवादतर्फ अगाडि बढ्नुपर्ने आवश्यकता औल्याउनुभएको थियो । उहाँले भन्नुभयो – “अबको समाजवाद सबैभन्दा विकसित समाजवाद हो, कम्युनिष्ट आन्दोलनभित्र अत्यन्त रुढीवादी चिन्तन हावी देखिएको अवस्थामा समाजवादको धरातललाई बलियो बनाउनु जरुरी छ ।”

नेकपाका महासचिव विष्णु पौडेलले मुलुकमा व्यवस्था बदलिय पनि जनताको आर्थिक तथा सामाजिक अवस्था अहिले पनि दयनीय रहेका बताउँदै नेकपाले मुलुकको सामाजिक, आर्थिक रुपान्तण गर्दै समाजलाई बदल्ने सङ्कल्प गरेको बताउनुभयो ।

पुस्तकमाथि टिप्पणी गर्दै त्रिभुवन विश्वविश्द्यालय मानविकी तथा सामाजिक शास्त्र सङ्कायका डीन प्रा डा शिवलाल भूसालले संविधानले निर्दिष्ट गरेका र नेकपाको चुनावी घोषणापत्रले परिकल्पना गरेको स्वाधीन अर्थतन्त्रको निर्माण कसरी सम्भव छ भन्ने विषयलाई पुस्तकले प्रष्टयाएको बताउनुभयो । उहाँले मुलुकको आर्थिक नीति बनाउन र समृद्धिको मार्गचित्र कोर्न पुस्तकले सहयोग गर्ने बताउनुभयो । त्रिविका प्राध्यापक डा सूर्य थापाले पुस्तकले वैज्ञानिक समाजवाद निर्माणका लागि जनमत सिर्जना गर्न योगदान दिने बताउनुभयो ।

पुस्तकका लेखक बामदेव क्षेत्रीले खसोखाससँग कुराकानी गर्दै भन्नुभयो – ‘पुस्तकसँग जोडेर नयाँ मोडलको समाजबादबारे बहस गर्ने समाजवादी अधययन केन्द्र अगाडि बढाउने सोंचमा छु ।’

पुस्तकमा आफूले नीजि स्वामित्व र सामुहिक स्वामित्वलाई बर्गिकरण गरेर उठाएको, शिक्षा, स्वास्थ्य निशुल्क हुनुपर्ने कुरा उठाएको क्षेत्रीले बताउनुभयो । राज्यले नागरिकलाई रोजगारीको ग्यारेन्टी गर्नुपर्ने र अहिले पनि कुनै बेरोजगार व्यक्ति आफू बेरोजगार भएको भन्दै राज्यबिरुद्ध अदालतमा जानसक्ने उहाँले बताउनुभयो ।

आफ्नो पुस्तक योजना बनाउन र बहसका लागि भएको लेखक तथा नेता क्षेत्रले बताउनुभयो । पुस्तक विचार, उद्योग र विकाशको खण्ड, भूमि र कृषिको खण्ड गरी तीनखण्डमा विभाजित रहेको छ । साँग्रिला बुक्सले प्रकाशित गरेको पुस्तकको २ हजार प्रति मध्ये एक हजार प्रति बिक्रि भइसकेको छ ।

फोटो : बिक्रम खत्री

शनिबार, मंसिर १५, २०७५ मा प्रकाशित

Leave a Reply

Your email address will not be published. Required fields are marked *

सम्बन्धित सामाग्री

WP Facebook Auto Publish Powered By : XYZScripts.com