अमेरिका र नेपालमा उत्तिकै ब्यस्त बराल, एकमहिनामा अमेरिकामा आधा दर्जन शो
प्रकाशित मिति : मंसिर १२, २०७५ बुधबार
नेपालमा विभिन्न सांगितिक कार्यक्रमहरुमा अत्यन्तै व्यस्त रहेका बरिष्ठ गायक यम बराल अमेरिकामा पनि विभिन्न सांगितिक कार्यक्रममा व्यस्त रहे । दशैं लगत्तै अमेरिका आएका यम बरालले एकमहिनाको अवधिमा झण्डै आधादर्जन कार्यक्रम गरेर स्वेदश फर्कदै छन् । एकमहिनाको अवधिमा बराल साउथ डाकोटा, ओहायो, भर्जिनिया लगायतका स्थानमा भएका कार्यक्रममा सहभागी भए ।
अमेरिकाबाट फर्के लगत्तै मंसिर १९ मा झापाको बिर्तामोडमा नारायण गोपालको स्मृति दिवशमा आयोजित कार्यक्रममा बरालले गीत गाउनेछन् । त्यसपछि उनी नेपालमा हुने विभिन्न महोत्वसमा सहभागी हुनेछन् ।
अक्टोबरको अन्तिममा अमेरिका आउनु अगाडि नेपालमा बरालले नेपालमा दर्जनौं कार्यक्रममा आफ्ना गीतहरु प्रस्तुत गरे । यसैबीच जुलाई १ मा यम बराल समेत सहनिर्माता रहेको चलचित्र भैरे प्रदर्शन गरिएको थियो । उक्त चलचित्रमा यम बरालले दुईवटै गीत गाएका थिए भने सनम माया लाको गीतमा बरालको संगीत रहेको थियो ।
सनम माया लाको बोलको उक्त गीत युट्युबमा मात्र ५ मिलियन भन्दा धेरैपटक हेरिएको छ । यम बरालको स्वरमा युट्युबमा रहेको यो नै सबैभन्दा धेरैपटक हेरिएको गीत हो । आगामी डिसेम्बरमा चलचित्र भैरैको विशेष शो अमेरिकामा समेत गर्न लागिएको चलचित्रका नायक बिक्रान्त बस्नेतले जानकारी दिए ।