अमेरिकामा कागजपत्रविहिन आप्रवासीको संख्या १२ बर्षमै सबैभन्दा कम
प्रकाशित मिति : मंसिर १२, २०७५ बुधबार
अमेरिकामा कागजपत्रविहिन आप्रवासीहरुको संख्या विगत १२ बर्षमै सबैभन्दा कम देखिएको छ । मंगलबार सार्वजनिक एउटा रिपोर्ट अनुशार कागजपत्रविहिन आप्रवासीहरुको संख्या अमेरिकामा एककरोडको हाराहारीमा झरेको छ ।
सन् २००७ मा अमेरिकामा कागजपत्रविहिन आप्रवासीहरुको संख्या १ करोड २० लाख रहेको थियो , जुन अहिलेसम्मकै अमेरिकी इतिहासमा उच्च रहेको थियो । तर क्रमश त्यो संख्या घट्दै गएको तथ्यांकले देखाएको छ ।
पिउ रिसर्चको रिपोर्ट अनुशार सन् १९९० मा अमेरिकामा कागजपत्रविहिन आप्रवासीहरुको संख्या ३५ लाख रहेकोमा सन् १९९५ मा ५७ लाख पुगेको थियो । त्यस्तै सन् २००० मा ८६ लाख कागजपत्रविहिनहरु अमेरिकामा रहेकोमा सन् २००७ मा यो संख्या १ करोड २२ लाखमा पुगेको थियो । तर सन् २०१६ मा अमेरिकामा कागजपत्रविहिनहरुको संख्या घटेर १ करोड ७ लाखमा झरेको तथ्यांकले देखाएको छ ।
अमेरिकामा रहेको कागजपत्रविहिनहरुको जनसंख्यामा सबैभन्दा धेरै मेक्सिकनहरु ५४ लाख रहेको जनाइएको छ । त्यस्तै मध्य अमेरिकनहरु १८ लाख, साउथ अमेरिकनहरु ६ लाख, क्यारेबीयन ४ लाख, एसियन १३ लाख, युरोपियन र क्यानेडियन ५ लाख, मध्यपूर्वका डेढ लाख र अफ्रिकनहरु २ लाख रहेको रिपोर्टमा उल्लेख छ ।
झण्डै १० लाख कागजपत्रविहिनहरु देशनिकाला हुनबाट बचाउने अस्थायी सुरक्षामा रहेको रिपोर्टमा जनाइएको छ । सन् २०१८ को अगस्त ३१ सम्म अमेरिकामा गैरकानुनी रुपमा छिरेका ७ लाख युवाहरु डाका कार्यक्रमको संरक्षणमा रहेका छन् । त्यस्तै विभिन्न १० देशका झण्डै ३ लाख आप्रवासीहरु टीपीएसबाट संरक्षित रहेका छन् ।
कागपत्रविहिनहरुको रिपोर्टमा त्यस्ता व्यक्तिको नम्बर पनि समावेश गरिएको छ, जसले एसाइलम आवेदन हालेका छन् तर स्वीकृत भइसकेको छैन ।
