गृहकार्य नगरेको आरोपमा १२ वर्षीय विद्यार्थीलाई पाँचसय पटक उठबस
प्रकाशित मिति : कार्तिक २९, २०७५ बिहीबार
विद्यालयहरु बालमैत्री बन्नुपर्छ । अझ अहिलेत स्थानीय तह नै बालमैत्री घोषणाको लहर छ । र देवचुली नगपालिका पनि बालमैत्री घोषणा भएको २ महिना पुगेको छ । तर, देवचुलीकै एउटा विद्यालयमा विद्यार्थीलाई सजाय स्वरुप ५ सय पटक उठबस गराइएको घटना बाहिर आएको छ ।
प्रगतिनगरस्थित नवल बोर्डिङ स्कुलको कक्षा ४ मा अध्ययन गर्ने ५ विद्यार्थीलाई गृहकार्य नगरिएको आरोपमा अंग्रेजी विषय शिक्षिका विद्या चापागाइईले कक्षा पाँचसय पटक उठबस गराएकी हुन् । १२ वर्षीय कुशल रानाभाट, रोहित खत्री, सुशान्त अर्याल, अंशुमन श्रेष्ठ र प्रिन्स बसेललाई उठवस गराएको विद्यालयका प्रिन्सिपल किरण भट्टराईले स्वीकारे ।
यातना पाएकामध्ये कुशल रानाभाट निकै कमजोर बनेका छन् । शिक्षिकाको सजायबाट रानाभाटको तिघ्रामा निलडाम छ । मांशपेशी थिलथिलिएको छ र सुन्निएको उपचारमा संलग्न प्राथमिक स्वास्थ्य केन्द्र दुम्कौलीका चिकित्सक त्रिभुवन भण्डारीले बताए ।
शिक्षिकाले विद्यार्थीहरुलाई गत कात्तिक १८ गते कारबाही गरेको भए पनि ढिलो गरी घटना सार्वजनिक भएको हो । घटनालगत्तै तिहार बिदाका कारण विद्यालय बन्द भएकाले पनि घटना बाहिर आउन नसकेको पीडित बालकका दाजु केशव रानाभाटले बताए ।