गैरकानुनी रुपमा सिमा पार गरेर अमेरिका आउनेहरु अब एसाइलमका लागि अयोग्य हुने
अमेरिकी सरकारले जारी गरेको नयाँ नियम अनुशार गैरकानुनी रुपमा सिमा पार गरेर अमेरिका आउनेहरु अब एसाइलमका लागि अयोग्य हुने भएका छन् । डिपार्टमेन्ट अफ जस्टिस र डिपार्टमेन्ट अफ होमल्याण्ड सेक्युरिटीले जारी गरेको नयाँ नियम अनुशार अब मेक्सिकोको सिमाक्षेत्रबाट गैरकानुनी रुपमा अमेरिका प्रवेश गर्नेहरु एसाइलमका लागि अयोग्य हुने भएका छन् ।
बर्षेनी दक्षिण अमेरिका हुँदै मेक्सिकोको सिमाक्षेत्रबाट अमेरिका प्रवेश गरेर सयौं नेपालीहरुले एसाइलम आवेदन दिने गरेका छन् । दलाललाई ५० लाखसम्म बुझाएर यसरी गैरकानुनी रुपमा अमेरिका आउनेहरुको संख्या सन् २०१२ यता ह्वात्तै बढेको थियो । अब उनीहरु पनि अमेरिकामा एसाइलमका लागि अयोग्य हुनेछन् । तर सिमाक्षेत्रमा आएर पोर्ट अफ इन्ट्रीमा आत्मसमर्पण गर्नेहरु भने एसाइलमका लागि योग्य हुन सक्नेछन् ।
नवनियुक्त महान्यायाधिवक्ता म्याथ्यु ह्वीटकर र होमल्याण्ड सेक्युरिटी प्रमुख क्रिस्चेन नेल्सनले बिहिबार संयुक्त बक्तब्य जारी गर्दै सिमापारबारे अमेरिकी राष्ट्रपतिको सिमाबन्दीलाई उल्लंघन गर्ने आप्रवासीहरु इमिग्रेशन एण्ड नेशनालिटी एक्टको २१२ (एफ) वा २१५ (ए) (वान) अनुशार एसाइलमका लागि अयोग्य हुने बताएका छन् । यो नियम राष्ट्रपतिको घोषणा लगत्तै जारी हुने वक्तब्यमा उल्लेख छ ।
अमेरिकी राष्ट्रपति डोनाल्ड ट्रम्पले यसबारेको घोषणामा छिट्टै हस्ताक्षर गर्ने जनाइएको छ । राष्ट्रपति ट्रम्पको मध्यावधी चुनाव अभियान पनि अध्यागमनका विषयमा नै केन्द्रीत रहेको थियो ।
