अमेरिकी अध्यागमनमा कडाई गर्ने महान्याधिवक्ता नै ट्रम्पबाट बर्खास्त
प्रकाशित मिति : कार्तिक २२, २०७५ बिहीबार
अमेरिकी राष्ट्रपति डोनाल्ड ट्रम्पले महान्यायाधिवक्ता जेफ सेसनलाई बर्खास्त गरेका छन् । अमेरिकामा महान्यायाधिवक्ता पद न्यायमन्त्री सरह हो, उनी डिपार्टमेन्ट अफ जस्टिसका प्रमुख हुन् । रसिया र ट्रम्पको चुनावी अभियानबीचको अनुसन्धानलाई नियन्त्रणमा लिन ट्रम्पले यो कदम चालेको बताइएको छ ।
ट्रम्पले सेसनलाई उनको सेवाका लागि ट्वीटरमार्फत धन्यवाद दिदै शुभकामना समेत दिएका छन् । सेसनका स्थानमा चिफ अफ स्टाफ म्याथु ह्वीटकरलाई अस्थायीरुपमा नियुक्त गरिएको छ, जसले रसियन अनुसन्धानको विरोध गर्दै आएका थिए ।
महान्यायाधिवक्ता जेफ सेसनले अमेरिकी अध्यागमनमा निकै कडाई गर्दै आएका थिए भने अध्यागमनमा कडाईका लागि विभिन्न आदेशहरुसमेत जारी गर्दै आएका थिए । नवनियुक्त म्याथु ह्वीटकर ट्रम्पप्रति निकै नै इमान्दार रहदै आएका छन् ।
जेफ सेसनले आफ्नो राजिनामा आफ्नो इच्छा अनुशार नभएको स्पष्ट पारेका छन् । राष्ट्रपतिकै अनुरोधमा आफूले राजिनामापत्र पेश गरेको सेसनले राजिनामापत्रमा नै उल्लेख गरेका छन् । आफ्नो कार्यकालमा कानुनको शासन स्थापना गरेको सेसनले दावी गरेका छन् ।
सन् २०१७ को मार्चदेखि सेसनले रसियन अनुसन्धानको पक्ष लिएपछि ट्रम्पलाई मन परेको थिएन । ट्रम्पको राष्ट्रपतीय अभियान र मस्कोबीचको सम्बन्धको अनुसन्धानकै सन्दर्भमा सेसन र ट्रम्पबीच मतभेद उत्पन्न हुँदै आएको थियो ।