यस कारण नहट्ने भए ओली सरकारका मन्त्री !
प्रकाशित मिति : कार्तिक १९, २०७५ सोमबार
प्रधानमन्त्री केपी ओली मन्त्रिपरिषद सदस्य हेरफेर गर्ने मनस्थितिबाट पछि हटेका छन् ।
तत्काल मन्त्री फेर्दा पार्टीभित्रको समीकरण परिवर्तन हुनुका साथै सरकार र पार्टी सञ्चालनमा जटिलता आउने देखिएपछि ओली मन्त्री हटाउने योजनाबाट तत्कालका लागि ब्याक भएका हुन् । दुई तिहाई बहुमतको शक्तिशाली सरकारले जनअपेक्षाअनुसार काम गर्न नसकेकामा सत्तारुढ नेकपाका शीर्षस्थ नेता नै असन्तुष्ट छन् । तर, प्रधानमन्त्री ओली र उनको सचिवालय हाँक्नेहरुले सरकारको काम प्रभावकारी हुन नसक्नुको दोष मन्त्रीहरुलाई लगाउँदै आएका छन् । ओलीको किचेन क्याबिनेटले कार्यक्षमता नभएको भन्दै हटाइने केही मन्त्रीको सूचीसमेत तयार पारिसकेको समाचारहरु बारम्बार आएका थिए ।
नेकपाका अर्का अध्यक्ष पुष्पकमल दाहाल प्रचण्डले समेत प्रधानमन्त्रीलाई काम गर्न असहज भए मन्त्री फेर्न सकिने बताएका थिए । छठपछि करिब आधा दर्जन मन्त्री हटाउने तयारीमा रहेका प्रधानमन्त्री ओली एकाएक उक्त मनस्थितिबाट पछि हटेका छन् । नेकपाका एक सचिवालय सदस्यले प्रधानमन्त्री र पार्टी नेतृत्व मन्त्री हटाउन नहुने निस्कर्षमा पुगेको बताए । उनका अनुसार प्रधानमन्त्रीले सरकारको काम प्रभावकारी नहुनुमा मन्त्री नभई कर्मचारीतन्त्र दोषी रहेको निचोडमा प्रधानमन्त्री ओली पुगेका छन् । ओलीको हटाउने सूचीमा मन्त्रीहरु रामबहादुर थापा बादल मातृका यादव, रवीन्द्र अधिकारी, रघुवीर महासेठ, लालबाबु पण्डित र थममाया थापाको नाम थियो ।
यसअघि ओलीमाथि मन्त्रीलाई भन्दा सचिवहरुलाई विश्वास गरेको आरोप लाग्दै आएको थियो । केही सचिवले आफ्नो प्रधानमन्त्रीसँग विशेष सम्बन्ध रहेको भन्दै मन्त्रीलाई अटेर गर्दै आएका छन् । सोही कारण पार्टी नेताहरुले मन्त्री फेर्नुभन्दा सचिवलाई च्याप्ने र मन्त्रीलाई विश्वास नगर्ने आफ्नो कार्यशैली फेर्न प्रधानमन्त्री ओलीलाई सुझाव दिँदै आएका थिए ।