भारतहुँदै अमेरिका जाने नेपालीले नो अब्जेक्सन लेटर बोक्नैपर्ने
प्रकाशित मिति : कार्तिक १९, २०७५ सोमबार
भारतहुँदै नेपाली पासपोर्टमा अमेरिका यात्रा गर्ने तयारीमा हुनुहुन्छ ? यदि हुनुहुन्छ भने अब तपाईले अनिवार्य रुपमा नेपाल सरकारबाट जारी नो अब्जेक्सन लेटर बोक्नुपर्ने भएको छ । अन्यथा तपाईलाई जहाजमा चढ्न दिइने छैन ।
अबदेखि भारतहुँदै अमेरिका यात्रा गर्नेहरुलाई पनि नो अब्जेक्सन लेटर माग्न थालिएको छ । अमेरिकाबाट नेपाल आउने ठूलो संख्यामा नेपालीहरुले भारतीय विमानस्थल प्रयोग गर्दै आएका छन् ।
खासगरी अमेरिकामा शरणार्थीका रुपमा बसेका नेपालीहरुले नेपाल आउँदा भारतीय विमानस्थलको प्रयोग गर्दै आएका छन् । आफन्तहरुलाई भारतमा बोलाएर वा स्थलमार्ग हुँदै नेपालमा आएर उनीहरुले घरपरिवारलाई भेट्दै आएकोमा अब यसरी आउने नेपालीहरु अमेरिका फर्कदा नो अब्जेक्सन लेटर बनाउनुपर्ने भएको छ ।
सरकारले श्रमको इजाजत नदिएका लिबिया, सिरिया, लेबनान, कुवेत, कतार, साउदी अरब, युनाइटेड अरब इमिरेट्स, इराक र ओमनमा नेपाली महिला अवैध रूपमा जाने र अलपत्र पर्ने भएपछि रोक्न एनओसी पेस गर्नुपर्ने नियम लागू भएको थियो । तर अहिले युरोप, अमेरिका, अस्ट्रेलिया जानेसँग पनि जहाजमा चढ्नका लागि एनओसी माग्न थालिएको छ ।
त्यस्तै भारतले चीन, हङकङ, मकाउ, पाकिस्तान र माल्दिभ्सबाट भारत जाने वा भारत भएर स्वदेश फर्किने नेपालीलाई भिसा अनिवार्य गरेको छ । यसअघि चीनबाट भारत जाँदा मात्र नेपालीहरुलाई भिसा अनिवार्य थियो ।