अमेरिकी चुनाव : जित्नेले सिनेटमा झिनो बहुमत ल्याउने
प्रकाशित मिति : कार्तिक १९, २०७५ सोमबार
मंगलबार हुने चुनावमा अमेरिकी राष्ट्रपति डोनाल्ड ट्रम्प आफै नउठेपनि यो चुनावले उनको राष्ट्रपतीय स्वरुप भने निर्धारण गर्नेछ । सिनेट र प्रतिनिधिसभा नै रिपब्लिकन पार्टीको नियन्त्रणमा रहेको अमेरिकी संसदमा यो चुनावले फेरबदल ल्याएमा त्यसको असर राष्ट्रपतीय स्वरुपमा पर्नेछ ।
दुबैसदनमा रिपब्लिकनको बहुमत हुँदाहुँदैपनि कुनै उल्लेख्य बिलहरु पारित हुन नसकेको सन्दर्भमा चुनावपछि रिपब्लिकनले बहुमत गुमाएमा राष्ट्रपतिले चाहेका कुनै पनि बिलहरु पारित हुन नसक्ने अवस्था समेत सृजना हुनसक्छ । यद्यपी ९ जना रिपब्लिकन सिनेटर र २४ जना डेमोक्रेटिक तथा २ जना स्वतन्त्र सिनेटरकोमात्र पदावधि सकिने भएकाले सिनेटमा यसपटकपनि डेमोक्रेटिक पार्टीलाई दवाव पर्न सक्छ ।
अहिलेको सिनेटमा ५१ जना रिपब्लिकन सिनेटरहरु रहेको अवस्थामा ४२ रिपब्लिकन सिनेटरहरुको कार्यकाल कायमै रहने भएकाले ९ जना सिनेटरलेमात्र जितेमा सिनेटमा रिपब्लिकनको बहुमत कायम रहनेछ । तर २३ जना डेमोक्रेटिक सिनेटरकोमात्र कार्यकाल कायम हुने भएकाले सिनेटमा बहुमत ल्याउनका लागि कम्तीमा २८ जना डेमोक्रेटिक सिनेटरले जित्न आवश्यक छ ।
कुक राजनीतिक रिपोर्ट अनुशार १४ वटा सिटमात्र मात्र डेमोक्रेटिक पार्टीले जित्ने निश्चितप्राय रहेको छ भने ६ सिटमा जित्ने बढी सम्भावना रहेको छ । बाँकी ६ वटा सिनेटरको सिटमा भने उच्च प्रतिस्पर्धा हुनेछ । उच्च प्रतिस्पर्धा भएका स्थानमा डेमोक्रेटिक पार्टीले जित्न नसकेमा सिनेटमा उनीहरुको जम्मा ४३ सिट आउनेछ । उच्च प्रतिस्पर्धा हुने भनिएका सबै स्थानमा जिते पनि डेमोक्रेटिक पार्टीले सिनेटमा जम्मा ४९ सिटमात्र ल्याउने देखिन्छ । यसर्थ डेमोक्रेटिक पार्टीलाई यसपटकपनि सिनेटमा बहुमत ल्याउन सहज छैन ।
सिनटेमा रिपब्लिकनहरुले ४ वटा सिट जित्ने पक्का जस्तै रहेको छ भने अरु १ वटामा उच्च सम्भावना रहेको छ । बाँकी ४ वटामा उच्च प्रतिस्पर्धा हुने भएकाले ती सिटहरु रिपब्लिकनले गुमाएमा सिनेटमा ४७ सिटमात्र जितेर बहुमत गुमाउनेछ । बहुमत ल्याउनका लागि रिपब्लिकनहरुले अनिश्चत भएका ४ वटा सबै सिटहरु जित्न आवश्यक छ ।
तर सिनेटमा जस्ले बहुमत ल्याएपनि अत्यन्तै झिनो बहुमतमात्र ल्याउने सम्भावना रहेको छ । सिनेटमा फिलिबस्टरका लागि कम्तिमा ६० मतको आवश्यकता पर्छ तर ६० पदमा जित्ने सम्भावना भने कुनै पनि पार्टीको देखिन्न । यद्यपी यसपटकको चुनावमा रिपब्लिकनले सिनेटमा केहीसिटहरु गुमाउने सम्भावना रहेको विश्लेषकहरुको भनाई छ ।
