लस एन्जलस एरियामा १५० आप्रवासी पक्राउ
युएस इमिग्रेशन एण्ड कस्टम इन्फोर्समेन्ट आइसले दक्षिणी क्यालिफोर्नियामा मारिएको छापामा १५० जना आप्रवासीहरुलाई नियन्त्रणमा लिइएको जनाएको छ । आइतबारदेखि मंगलबारसम्म संचालन गरिएको अपरेशनका क्रममा कागजपत्रविहिन आप्रवासीहरुलाई पक्राउ गरिएको हो । अपरेशन लस एन्जलस, अरेन्ज, सान बर्नान्डिनो, रिभरसाइड, सान्टा बारबरा र भेन्चुरा काउन्टीमा संचालन गरिएको थियो ।
पक्राउ परेकाहरुमध्ये ९० प्रतिशतको अपराधको पृष्ठभूमी रहेको आइसले दावी गरेको छ । बाँकी भने कुनै अपराध नगरेका कागजपत्रविहिनहरु हुन् । आइसले कागजपत्रविहिन आप्रवासीहरुलाई पक्राउ गर्ने क्रम तीब्र भइरहँदा दक्षिणी क्यालिफोर्नियामा उनीहरुलाई पक्राउ गरेको हो ।
क्यालिफोर्नियाको स्थानीय कानुन अनुशार अपराध गरेकाहरुलाई समेत जेलबाट आइसलाई हस्तान्तरण नगरिएको भन्दै आइसका अधिकारी थोमस गिल्सले आक्रोश व्यक्त गरेका छन् । अमेरिकाका कैयन स्यांचुअरी सिटीहरुले कागजपत्रविहिन आप्रवासीहरुले कुनै अपराध गरेको खण्डमा उनीहरुलाई स्थानीय जेलमा सजाय भोगिसकेपछि अध्यागमनलाई हस्तान्तरण नगरिकनै छाड्ने गरेका छन् ।
गत जुनमा आइसको लस एन्जलस फिल्ड अफिसले १५७ कागजपत्रविहिन आप्रवासी पक्राउ गरेको थियो । त्यस्तै यो बर्षको सुरुताका पनि २१२ जना कागजपत्रविहिन आप्रवासीलाई पक्राउ गरिएको थियो ।
