२०१९ का डिभी विजेतालाई सोमबारदेखि भिसा, ६ सय सम्म केस नम्बर हुने नेपालीलाई अक्टोबरमा भिसा
प्रकाशित मिति : आश्विन १३, २०७५ शनिबार
आर्थिक बर्ष २०१९ का लागि डिभी विजेताहरुले आगामी सोमबारदेखि भिसा पाउन थाल्ने भएका छन् । सोमबारदेखि अमेरिकामा रहने डिभी विजेता नेपालीहरुले युएससीआईएसमार्फत स्टाटस एड्जस्ट गर्न सक्नेछन् भने अमेरिका बाहिर रहेका नेपाली डिभी विजेताहरुले काठमाडौंमा रहेको अमेरिकी दूतावासमार्फत भिसा प्राप्त गर्न सक्नेछन् ।
तर अक्टोबर महिनाका लागि डिभी विजेता नेपालीहरुका लागि सिमाबन्दी लगाइएको छ । ६ सयसम्म केसनम्बर हुनेहरुको मात्र अक्टोबरमा भिसा प्रकृया गरिनेछ । त्यस्तै नोभेम्बरमा ११ सयभित्र केसनम्बर हुने नेपाली डिभी विजेताहरुको मात्र भिसा प्रकृया गरिनेछ । सन् २०१९ का लागि डिभी विजेताहरुले तोकिएको केसनम्बरभित्र पर्नासाथ ढिला नगरी भिसा प्रकृया तुरुन्त अगाडि बढाउन सुझाव दिइएको छ । अन्यथा डिभी जितेपनि अमेरिकाको भिसा नपाउने सम्भावना रहन्छ ।
सन् २०१९ का लागि डिभी लोटरीको रिजल्ट गत मे १५ मा सार्वजनिक भएको थियो । अमेरिकी विदेश मन्त्रालयका अनुशार आर्थिक सन् २०१९ का लागि ३६३३ जना नेपालीहरुलाई डिभी लोटरी परेको छ । उनीहरुले आगामी सोमबारदेखि भिसा पाउन सुरु गर्नेछन् भने उनीहरुले सन् २०१९ को सेप्टेम्बर ३० सम्म भिसा पाउनेछन् ।
आर्थिक बर्ष २०१९ का लागि विश्वभरबाट भने ८७ हजार ६ सय १० जनाले डिभी लोटरी पारेका छन् । उनीहरुमध्ये ५० हजारको हाराहारीमा मात्र अमेरिकाको ग्रिनकार्ड पाउनेछन् । ठ्याक्कै ५० हजार जनालाईमात्र डिभी पार्दा सबै योग्य नहुने तथा बदलिएको अवस्थाका कारण अमेरिका आउन इच्छुक नहुने भएकाले ५० हजार भन्दा धेरैलाई डिभी लोटरी पार्ने गरिएको अमेरिकी सरकारले जनाएको छ ।
सन् २०१९ का लागि विश्वभरबाट १ करोड ४३ लाख ५२ हजार १३ जनाले डिभी लोटरी भरेका थिए । जसमा उनीहरुका आफन्तहरु समेत जोड्दा २ करोड २४ लाख २५ हजार ५३ जना हुन आउँछ । उनीहरुले गतबर्ष सन् २०१७ को अक्टोबर १८ देखि नोभेम्बर २२ सम्म डिभी लोटरी भरेका थिए ।
२०१९ का लागि एसियाका मुलुकहरुमध्ये सबैभन्दा धेरै डिभी लोटरी पार्नेमा नेपाल दोश्रो स्थानमा परेको छ । एसियाको पहिलो स्थानमा इरानका ४१९९ जनालाई डिभी लोटरी परेको छ । इरान यो बर्ष विश्वमा नै सबैभन्दा धेरै डिभी लोटरी पार्ने मुलुक हो ।