मनिषा कोइरालाका नभनिएका कथाहरु पुस्तकका रुपमा आउने
प्रकाशित मिति : भाद्र ५, २०७५ मंगलबार
वलिउडमा चर्चित कलाकार मनिषा कोइरालाका नभनिएका कथाहरुको संगालो पुस्तकाकारमा आउने भएको छ । क्यान्सरसँगको युद्ध जितेर पुन अभिनययात्रामा फर्केकी मनिषाले यो आफ्नो पहिलो पुस्तक भएको बताएकी छिन् ।
द बुक अफ अनटोल्ड स्टोरिज नामको उक्त पुस्तकबारे इन्स्टाग्राममा पोष्ट गर्दै मनिषाले आफ्ना कथाहरु भन्न प्रेरित गरेकोमा पेंगुइन इन्डियालाई धन्यवाद समेत दिएकी छिन् । मनिषाको उक्त पुस्तकमा उनका नभनिएका कैयन प्रेरणादायी कथाहरु रहने अपेक्षा गरिएको छ । मनिषाले पुस्तकमा क्यान्सरलाई कसरी जित्न सम्भव भयो भन्ने विषयमा अनुभवहरु पस्केको जनाइएको छ ।
सन् २०१२ मा मनिषालाई क्यान्सर भएको पत्ता लागेपनि उनको न्युयोर्कमा उपचार भएको थियो । उच्च आत्मवल र उपचारपछि क्यान्सरलाई समेत जितेर मनिषा अभिनय यात्रामा पुन फर्केकी थिइन् । हालै उनी चर्चित चलचित्रमा सन्जुमा सशक्त भूमिकामा देखिएकी थिइन् ।
मनिषाको उपचारका क्रममा अमेरिकाको न्युयोर्कमा रहदा आमा सुश्मा कोइरालाका अविस्मरणीय क्षण
मनिषा कोइरालाको न्युयोर्कमा उपचार भइरहेको थियो । उनको स्वास्थ्यलाभका लागि शुभचिन्तकहरुले शुभकामना दिइरहेका थिए । पाठेघरको क्यान्सरबाट पीडित मनिषाको रेखदेख उनकी आमा सुश्मा कोइरालाले गरिरहेकी थिइन् । त्यस्तैमा एक दिन मनिषा रुन थालिन् ।
अनि मनिषाको आमा सुश्माले उनलाई सोधिन् –“तिमी किन यसरी रोएको ?” मनिषाले भक्कानिदै भनिन् –“म यस्तो जीन्दगी बाँच्न चाहन्न मामु ।” मनिषाको यस्तो कुरा सुनेर सुश्माले भनिन् –“त्यस्तो कुरा नगर । आत्मविश्वासी बन । सबै ठीक हुनेछ । ”
एकदिनमात्र यसरी हार खाएर रुन पुगेकी मनिषाले कहिलेपनि आत्मविश्वास गुमाइनन् । त्यसपछि कहिले पनि जीवनदेखि हारेको कुरा गरिनन् । अन्तत डाक्टरको उपचार र मनिषाको आत्मविश्वासका सामु क्यान्सरले हार खायो । अनि मनिषा क्यान्सरमुक्त भइन् ।
=============================
मुम्बईमा पाँचसातजना काम गर्ने मान्छे राखेकी मनिषा कोइराला र उनकी आमालाई उता कहिले पनि घरायाशी काम गर्नु परेन । भान्साको कामदेखि लण्ड्रीको कामसम्म अरुले नै गरिदिन्थे । त्यसैले मनिषा र मनिषाकी आमाले मुम्बईमा खाना पकाउनु परेन । कपडा धुनु पनि परेन ।
तर उपचारका क्रममा न्युयोर्कमा आउदा भने मनिषाले खाना पकाउने, लण्ड्री गर्ने मात्र नभई घरमा भ्याकुम र पोछा लगाउने प्रयास पनि गरिन् । कामको सधै सम्मान गरिने अमेरिकामा यही कुरा बुझेर उनले आफै काम गर्ने जिद्दी गर्थिन् आमा सुश्मा कोइरालासँग ।
एकदिन मनिषा र उनकी आमा सुश्माले कपडा धुनका लागि वासिंङ मेसिनमा राखे । वासिंङ मेसिनमा कपडा धोएपछि तातो ड्रायरमा कपडा सुकाए । कपडा सुकाएपछि बाहिर निकालेर हेर्दा एउटा बच्चाले लगाउने जस्तो कपडा भेटियो । सुरुमा त उनीहरु बच्चाले लगाउने कपडा आफूकहाँ कसरी आयो भनेर चकित परे । किनभने उनीहरुसँग कोही बच्चा थिएन । तर एकैछिनमा थाहा भयो कि त्यो त मनिषाको स्वेटर पो रहेछ । तातो पानीमा धुन नहुने र तातो ड्रायरमा सुकाउन नहुने त्यो स्वीटर खुम्चिएर बच्चाको कपडा जस्तो भएछ ।
=============================
मनिषा कोइराला बिरामी भइसकेपछि उनका भाई बलिउडका कलाकार सिद्धार्थ कोइराला सपरिवार मनिषालाई भेट्न न्युयोर्क आए । उनीहरु न्युजर्सीमा बसेका थिए , मनिषाले न्युयोर्कमा उपचार गराइरहेकी थिइन् । मनिषालाई भेट्न आएका सिद्धार्थ पनि न्युयोर्कमा नै आए ।
दिदीभाई लामो समयसम्म कुरा गरेर बसिरहे । आफू न्युयोर्कमा हुन्जेल सिद्धार्थले दिदी मनिषालाई एकैछिन पनि छोडेनन् । मनिषाकी आमाले सिद्धार्थलाई पटकपटक परिवारलाई घुमाउन लैजान र सिद्धार्थलाई पनि यताउता घुम्न जानका लागि आग्रह गरिन् । तर सिद्धार्थले मानेनन् । उनले दिदीको आत्मविश्वास बढाउदै बसिरहे ।
दिदीभाईको यस्तो प्रेम देखेर मनिषाकी आमा सुश्माका आँखा रसाए । उनी निकै भावुक भइन् । उनले आशु थाम्न सकिनन् । अनि एक्लै रोइन् ।
=============================
खसोखासका प्रधानसम्पादक किशोर पन्थीसँगको कुराकानीमा आधारित ।