दुईबर्षमा १५१७ नेपाली विद्यार्थी अमेरिकामा ओभरस्टे

दुईबर्षको अवधिमा १५ सय १७ जना नेपाली विद्यार्थी अमेरिकामा ओभरस्टे भएको अमेरिकी सरकारको डिपार्टमेन्ट अफ होमल्याण्ड सेक्युरिटीले जनाएको छ । डिपार्टमेन्ट अफ होमल्याण्ड सेक्युरिटीले विगत तीनबर्षदेखि अमेरिकामा गैरआप्रवासी भिसामा आएर ओभरस्टे हुनेहरुको ट्रयाकिङ रेकर्ड राख्न थालेपनि गतबर्षदेखि ओभरस्टे हुने विद्यार्थीको छुट्टै रेकर्ड राख्न थालेको हो ।

आर्थिक बर्ष २०१७ मा ३५५६ जना नेपाली विद्यार्थीहरु भिसा सकिएर अमेरिकाबाट फर्कनुपर्ने थियो । तर त्यसमध्ये ओभरस्टे भइसकेपछि ७८ जना फर्किए । अन्य ७१२ जना विद्यार्थीहरु ओभरस्टे भइसकेपछि पनि अमेरिकामा नै बसे । यसरी कुल ७९० जना नेपाली विद्यार्थीहरु अमेरिकामा ओभरस्टे हुन पुगे । अमेरिका छाड्नुपर्नेमध्येका कुल २२ दशमलव २२ प्रतिशत नेपाली विद्यार्थीहरु अमेरिकामा ओभरस्टे भए । त्यसमध्ये ओभरस्टे भइसकेपछि अमेरिका छाडेका बाहेक कुल संख्याको २० दशमलव २ प्रतिशत त अमेरिकाभित्र नै बसे, नेपाल फर्केनन् ।

त्यस अगाडि आर्थिक बर्ष २०१६ मा अमेरिकाबाट भिसा सकिएर फर्कनुपर्ने नेपाली विद्यार्थीहरुको कुल संख्या २८७३ रहेको थियो । तर त्यसमध्ये ५२ जना विद्यार्थीहरु अमेरिकामा भिसा सकिएर ओभरस्टे भइसकेपछि अमेरिका छाडेर गए । बाँकी ६७५ जना नेपाली विद्यार्थीहरु अमेरिकामा नै ओभरस्टे भए, फर्केर गएनन् । आर्थिक बर्ष २०१६ मा जम्मा ओभरस्टे हुने नेपाली विद्यार्थीहरुको संख्या ७२७ रहेको डिपार्टमेन्ट अफ होमल्याण्ड सेक्युरिटीले जनाएको छ । अमेरिकाको भिसा सकिएका कुल नेपाली विद्यार्थीहरुमध्ये २५ दशमलव ३१ प्रतिशत ओभरस्टे भएका थिए । त्यसमा भिसा सकिएपछि फर्कनेहरुको संख्या घटाएर अमेरिकाको भिसा सकिएपछि अमेरिकाभित्रै रहने नेपाली विद्यार्थीहरु २३ दशमलव ५० प्रतिशत रहेका थिए ।

दुईबर्षको अवधिको तुलना गर्दा भने अमेरिकामा ओभरस्टे हुने नेपाली विद्यार्थीहरुको संख्या बढेपनि प्रतिशत भने घटेको छ ।

अमेरिकामा गैर आप्रवासी भिसामा छिरेर ओभरस्टे हुनेहरुको ट्रयाकिङ गर्नुपर्ने माग तीब्र भएपनि अमेरिकी सरकारको डिपार्टमेन्ट अफ होमल्याण्ड सेक्युरिटीले गैरआप्रवासी भिसामा अमेरिका आएर ओभरस्टे हुनेहरुको ट्रयाकिङ सुरु गरेको थियो । अमेरिका छिरेकाहरुको बारेमा अध्यागमन अधिकारीहरुले पोर्ट अफ इन्ट्रीमा विवरण राख्दै आएपनि अमेरिका छाडेर जानेहरुको बारेमा विस्तृत जानकारी राख्ने प्रणाली विकाश गरिएसँगै विवरण तयार पारिएको हो ।

ओभरस्टे हुनेहरुको बारेमा सही ट्रयाकिङ गर्न नसक्दा अमेरिकी भिसा प्रणालीमा भएको कमजोरीको फाइदा आतंकवादीहरुले लिन सक्ने डर बढिरहदा अमेरिकी सरकारले पर्यटक भिसामा आएर ओभरस्टे हुनेहरुका बारेमा ट्रयाक गर्न थालेको हो । ओभरस्टे हुनेहरुको पहिचान गर्नु राष्ट्रिय सुरक्षा, सार्वजनिक सुरक्षा, अध्यागमन कानुनको पालनाका सन्दर्भमा महत्वपूर्ण हुने अमेरिकी सरकारले स्पष्ट पारेको छ ।

२० वर्ष अगाडि नै अमेरिकी संसदले अमेरिकामा ओभरस्टे हुनेहरुको बारेमा ट्रयाक गर्ने कानुन पारित गरेपनि अमेरिकी प्रणालीमा रहेको परम्परागत शैलीका कारण भिसा बाँकी छँदै अमेरिका छाड्ने र अमेरिकामा आएर ओभरस्टे हुनेहरुको बारेमा चुस्त दुरुस्त तरिकाले रिपोर्ट राख्न मुस्किल परिरहेको थियो । सेप्टेम्बर ११ को हमला पछि अमेरिकाको सरकारले प्रणालीको विकाशका लागि मिलियन डलर खर्च गरिसकेको छ ।

बिहिबार, साउन २४, २०७५ मा प्रकाशित

Leave a Reply

Your email address will not be published. Required fields are marked *

सम्बन्धित सामाग्री