दशैँ अगाडि नै आउने भयो मेलम्चीको पानी
प्रकाशित मिति : असार ११, २०७५ सोमबार
काठमाडौंमा दशैं अगाडि नै मेलम्चीको पानी ल्याउने सहमति भएको छ । मेलम्ची खानेपानी आयोजना निर्माणको जिम्मेवारी लिएको इटालियन ठेकेदार कम्पनी सीएमसी र सरकारबीच दशैं अघि नै मेलम्चीको पानी काठमाडौं ल्याउन सहमति भएको हो ।
भूकम्प र नाकाबन्दीबाट भएको क्षति उपलब्ध गराउन माग गर्दै आएको सीएसी र सरकारबीच गएको शुक्रबार सहमति भएको खानेपानी तथा सरसफाइमन्त्री विना मगरले सोमबार जानकारी दिइन् ।
मन्त्रालयमा आज आयोजित पत्रकार सम्मेलन गरेर उनले निर्माण कम्पनीले दशैं अघि नै काठमाडौंमा पानी आउने गरी आउँदो असोज १४ गते भित्र मेलम्चीको पानी सुन्दरीजलमा पठाउने सहमति गरिएको पनि स्पष्ट पारिन् ।
कम्पनीको म्याद २ सय १२ दिन थप गरिएको भन्दै उनले थपिएको म्यादभित्र पनि मेलम्चीको पानी काठमाडौं ल्याउने काम नभए निर्माणको जिम्मेवारी पाएको सिएमसी कम्पनीमाथि कडा कार्वाही गर्ने चेतावनी समेत दिइन् ।