प्रहरीको न्याय : ज्यान लिन खोज्ने श्रीमानकै जिम्मामा श्रीमती
प्रकाशित मिति : असार १०, २०७५ आईतबार
श्रीमानले कुटेर सख्त घाइते भएकी महिलालाई न्याय दिनुको सट्टा इलाका प्रहरी कार्यालय पथरीले मेलमिलाप गराई कुट्ने श्रीमानको जिम्मा लगाएर पठाएको छ ।
मोरङको पथरी शनिश्चरे नगरपालिका ४ की ५५ वर्षीष डिकमाया बराइली परपुरुषसँग बोलेको आरोपमा श्रीमानले कुट्दा सख्त घाइते भएकी थिईन् ।
उनको दाहिने हात भाँच्चिनुको साथै टाउकोमा चोट लागेको थियोे । टाउकोको चोटमा ८ वटा टाँका लगाइएको प्रहरीले जनाएको छ ।
घटना लगत्तै ६० वर्षका बेदबहादुर बराइली प्रकाउ परेका थिए । प्रहरीले कुटपिट गर्ने श्रीमान् बराइलीलाई कारबाही गर्नुको सट्टा मेलमिलाप गराएर पठाएको हो ।
इलाका प्रहरी कार्यालय पथरीका मोरङका सइ सूर्य प्रसाईंले परिवारका छोराबुहारी आएर अबदेखि मिलेर बस्ने भनेपछि मिलापत्र गरी अाइतबार पठाएको बताए । डिकमायाले भने ३ वर्षयता श्रीमानले कुटपिट गर्दै आएको बताएकी छिन् ।