यी हुन् अमेरिका पलायन अभिनेत्री

खसोखास अमेरिका ब्यूरो

---

प्रकाशित मिति : कार्तिक ११, २०७३ बिहीबार

कलाकारका रूपमा पाइला टेकेपछि सुटक्क अमेरिकाको भिसा ‘ट्राइ’ गर्नेहरू ह्वात्तै बढेका छन् अहिले । हुन त यो नौलो खबर भने होइन । तर, पछिल्लो समय अभिनयमा राम्रै जमेका र मनग्य आम्दानी गरिरहेका कलाकर्मी पनि अमेरिकामै ‘सेटल’ हुने दाउमा रहेको पाइन्छ ।
कतिपय कलाकार भने अमेरिकामा बसाइँ सरिसकेका छन् । कतिपय नाम चलेका अभिनेता, अभिनेत्री पनि भिसा नपाएर टेन्सनमा छन् । अमेरिका उड्ने र उतै घरजम गरेर बस्ने अनि नेपाल आउँदा ठुल्ठूला गफ हाँक्नेहरू पनि कम छैनन् ।

थुप्रै नाम चलेका अभिनेत्रीले आफूलाई अमेरिकाको हावामा बहकाइसकेका छन् । तत्कालीन चर्चित अभिनेत्री कृष्टि मैनाली एकाएक पतिका साथ अमेरिका उडिन् । युगदेखि युगसम्म, अधिकार, कसम, राधाकृष्ण, लक्ष्मीपूजालगायत थुप्रै फिल्मकी चर्चित अभिनेत्री कृष्टि अमेरिका पुगेको झन्डै दुई दशक पुग्न लागिसक्यो । तर, उनी त्यसपछि स्वदेश फर्किएको थाहा छैन ।

अर्की चर्चित अभिनेत्री सारंगा श्रेष्ठ पनि अमेरिका बस्न थालको डेढ दशक भयो । केही समयअघि स्वदेश आएकी सारंगाले विदेशमा दुईपटक बिहे गरिन् । स्वदेशमा हुँदा उनी र रमेश उप्रेतीबीच राम्रै अफेयर चलेको थियो । उनीहरूबीच बिहे हुनेसम्मको हल्ला पनि चलेको थियो । लामो समय अमेरिका बसेर स्वदेश आएको वेलामा एक दशकअघि उनले शिव रेग्मीको युद्ध फिल्मको एउटा गीतमा नृत्य गरेकी थिइन् । उनी अमेरिकामा पति र सन्तानका साथ रमाइरहेकी छिन् ।

पूजा चन्दले पनि अमेरिकाको बाटो तताइन् । पति सुरज चन्दसँग सम्बन्धविच्छेद गरेको केही वर्षपछि उनी अमेरिका उडेकी हुन् । पाँच वर्षअघि काठमाडौँ आएको वेला उनले गीतिसंग्रह कसरी सम्झाऊँ सार्वजनिक गरेकी थिइन् । एल्बम चलेन । त्यसपछि अमेरिका फर्किएकी उनले दुई वर्षअघि राजु लामा नामक युवासँग दोस्रो बिहे गरिन् । केही समयअघि पनि उनी नेपाल आएकी थिइन् । तर उनी अमेरिकामै रमाउने गर्छिन् ।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

निर्देशक दीपक श्रेष्ठसँगको अफेयरका कारण चर्चा बटुल्ने गर्थिन् युना उप्रेतीले । उनलाई दीपकले पर्खिबसेँ, हिम्मत–२ लगायतका फिल्ममा हिरोइन बनाए । तर, उनले फिल्ममा अपेक्षाकृत सफलता हासिल गरिनन् । त्यसपछि उनी पनि उडिन् अमेरिका । अमेरिका पुगेको केही समयपछि उनले त्यहीँ बस्ने एक पुरुषसँग बिहे गरेको खबर आयो ।

एक दशकअघि अमेरिका पुगेकी जल शाह हालै दोस्रोपटक काठमाडौँ आइन् । अमेरिका पुगेको केही समयपछि त्यहीँ निवासी शरद रिमालसँग बिहे गरेकी जल एक छोरीकी आमा हुन् । अस्वाभाविक मोटाइका कारण उनलाई देख्ने, भेट्नेहरू चकित पर्ने गरेका छन् । जल अझै पनि फिल्म अभिनय गर्ने चाहना व्यक्त गर्छिन् ।

अभिनय गरेका कुनै फिल्मले पनि उल्लेख्य सफलता हासिल नगरेपछि तनावमा रहने गरेकी अभिनेत्री नन्दिता केसी पनि अमेरिका पलायन भएकी छिन् । उनी केही महिनाअघि अमेरिका उडेकी हुन् । उनी अमेरिकामा बसेर ग्रिनकार्ड हात पार्ने चक्करमा छिन् ।

हास्यअभिनेता स्व. गोपालराज मैनालीकी सुपुत्री सज्जा मैनाली अमेरिका पसेको डेढ दशक भइसक्यो । उनी बिहेपछि पति ओम भट्टराईका साथ अमेरिका उडेकी हुन् । त्यसपछि उनी स्वेदश फर्किएकी छैनन् । नौ डाँडापारि, मनको टुक्रा, गोरेटो, सावधानलगायतका फिल्मकी हिरोइन सज्जा फिल्म तथा सञ्चारकर्मीको सम्पर्कमा आउन भने मन पराउँदिनन् । सज्जा र निखिल उप्रेतीबीच अफेयर चलेको थियो ।

पति शंकरका साथ क्यानडा  हुँदै अमेरिका पसेकी ऋचा घिमिरेले त्यहाँ पुगेर दुई सन्तानलाई जन्म दिइसकेकी छिन् । उनी तत्काल स्वदेश फर्कने योजनामा छैनन् । ऋचापछि अरुणिमा लम्साल पनि पति अमितका साथ अमेरिका पुगिन् । उनीहरू पनि ग्रिनकार्डको चक्करमा रहेको बताइन्छ ।

पुराना बलिउड अभिनेता राहुल रोयका साथ इन्डिया  हुँदै अमेरिका पुगेकी उषा पौडेल अभिनेता सुधांशु जोशीसँग बिहे गर्ने तयारीमा छिन् । सुधांशुले जेठी पत्नीसँग सम्बन्धविच्छेद गरी उषासँग बिहे गर्न लागेका हुन् ।

अमेरिका जाने–आउने गरेका हिरोइन पनि थुप्रै छन् । अमेरिकाले भिसा नदिनाले इन्तु न चिन्तुको अवस्थामा पुगेका अभिनेत्री पनि थुप्रै छन् ।

नयाँ पत्रिकाबाट ।