Follow @khasokhasmag

लोकमान बारे फैसला गर्ने जिम्मा प्रचण्डलाई !


प्रकाशित मिति : कार्तिक ६, २०७३ शनिबार

माओवादी केन्द्रको हेडक्वाटर बैठकले अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीलाई महाअभियोग लगाउने विषयको अन्तिम निर्णय गर्ने जिम्मा पार्टी अध्यक्ष पुष्पकमल दाहाल प्रचण्डलाई दिएको छ ।

शनिवार सम्पन्न उक्त बैठकले अन्य दलसँग परामर्श गर्ने र अन्तिम निर्णयमा पुग्ने जिम्मा पार्टी अध्यक्ष प्रचण्डलाई दिएको हो । बैठकपछि माओवादी केन्द्रका प्रवक्ता पम्फा भुसालले सबै पक्षसँग छलफल गरी महाअभियोगबारे निर्णय लिने अधिकार पार्टी अध्यक्षलाई दिइएको जानकारी दिइन् ।

संसदमा माओवादी केन्द्र र नेकपा एमालेका सांसदहरुले कार्कीविरुद्ध महाअभियोग प्रस्ताव दर्ता गरेका छन् ।आइतबार (भोलि) बस्ने संसद बैठकमा प्रस्ताव पेस गर्ने तयारी छ ।

यसैबीच सत्तारुढ दल नेकपा माओवादी केन्द्रका सांसद तथा महाअभियोग सिफारिश समितिका सदस्य अमनलाल मोदीले अख्तियार प्रमुख लोकमा सिंह कार्कीलई संसदको दुई तिहाईबाट विदा गर्ने दाबी गरेका छन् । शनिबार रिपोर्टर्स क्लब नेपालले आयोजना गरेको साक्षात्कारमा बोल्दै सांसद मोदीले नेपालमा लोकतन्त्र र कानूनी राज्यभन्दा माथि कोही नभएको भन्दै अख्तियार प्रमुख कार्कीले कानूनी राज्यको धज्जी उडाएकोले उनलाई संसदको दुई तिहाईबाट विदा गर्ने बताएका हुन् ।

उनले भोलिदेखि सुरु हुने व्यवस्थापिका संसदको बैठकमा यो विषयमा छलफल हुने समेत स्पष्ट पारे । त्यस्तै उनले महाअभियोग सिफारिश समिति लोकमानकै लागि भनेर गठन नगरिएको समेत प्रष्ट्याए । नेकपा एमालेका सांसद रामेश्वर फूयाँलले अख्यितार प्रमुख कार्कीविरुद्धको महाअभियोग प्रस्ताव पारित हुने ठोकुवा गरेका छन् ।

गणतन्त्र ल्याउन पूर्वराजा ज्ञानेन्द्रले बल पुर्याझैं लोकमानले पनि आफ्नोविरुद्ध महाअभियो प्रस्ताव ल्याउन आँफैले मलजल गरेको उनको आरोप थियो । उनले अघि थपे,‘अति गरे, खति हुन्छ भनेको यही हो, उनले कानुनी राज्यलाई ठाडै चूनौति दिएका थिए, त्यसैले यो प्रस्ताव आएको हो ।’

उनले भोलिबाट महाअभियोग प्रस्तावमाथि छलफल हुने भएकोले अबको एक महिनाभित्रै यो विषय टुँगो लाग्ने समेत जनाए ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com