नेपाली अनाथसँगै अमेरिकी शिक्षिकाले लगाइन् दशैंको टिका
प्रकाशित मिति : आश्विन २७, २०७३ बिहीबार
सिएनएन हिरो म्यागी डोयनको सहयोगमा अमेरिकाको न्युजर्सीमा अध्ययन गरिरहेका तीनजना अनाथ विद्यार्थीहरुसँगै सोही स्कुलकी क्रिश्चियन शिक्षिकाले न्युयोर्कमा टिका ग्रहण गरेर दशैं मनाएकी छिन् ।
न्युजर्सीको पेक स्कुलकी शिक्षिका सुजी बेकर र विद्यार्थीहरु कृष्ण शाही, सागर सुनार र भक्त सिजालले न्युयोर्कको रिजउडमा नेपाली दुर्गा मन्दिरमा उपस्थीत भएर दशैंको टिका लगाएका हुन् ।
विद्यार्थीहरु कृष्ण शाही, सागर सुनार र भक्त सिजालले सिएनएन हिरो म्यागी डोयनको सहयोगमा नेपालबाट अमेरिकाको न्युजर्सीमा आएर अध्ययन गरिरहेका छन् । म्यागीले विद्यार्थीहरुलाई नेपाली संस्कृतिसँग नजिक राख्ने चाहना राखे अनुरुप अपिल सापकोटाले उनीहरुलाई सम्पर्क गरी टिका लगाउने व्यवस्था मिलाएका थिए ।
शिक्षिका सुजी बेकर र तीनजना विद्यार्थीहरुले हरिनारायण सापकोटाबाट दशैंको टिका र जमरा ग्रहण गरेका हुन् । उनीहरुले दशैंको टिका र जमरा ग्रहण गरिरहँदा बेद खरेल र झबिन्द्र खरेल पनि उपस्थीत भएर दशैंको शुभकामना आदान प्रदान गरेका थिए ।
अमेरिकाको न्युजर्सी राज्यमा बेबी सिटिंगको जागिरबाट गरेको आम्दानीले जिन्दगीको गुजारा चलाउदै गर्दा बचेको सानो हिस्साको रकम बोकेर नेपाल घुम्न गएकी म्यागी डोयनले पश्चिम नेपालको सुर्खेतका अनाथ बालबालिकाको अवस्था देखेर उनीहरुको हितमा काम गार्ने अठोट गरेको केहि बर्ष नबित्दै उनको सेवाको यात्रा सिएनएन हिरोको उपाधिबाट पुरष्कृत भएकी थिइन् ।
संयुक्त राज्य अमेरिकाको न्युजर्सी राज्यमा बसोबास गर्दै आएकी ३० वर्षिया डोयन पश्चिम नेपालको सुर्खेतमा अनाथ बालबालिकाको पालन पोषण र शिक्षा दिक्षाका लागि कोपिला भ्याली समाजको स्थापना गरी काम गर्दै आएकी छिन् । न्युजर्सीमा अध्ययन गरिरहेका तीनजना अनाथ किशोरहरु म्यागीकै सहयोगमा अमेरिका आएका हुन् ।
