न्युयोर्क निवासी साहित्यकार गीता खत्रीलाई विशिष्ट महिला साहित्य पुरस्कार
प्रकाशित मिति : चैत्र २, २०७४ शुक्रबार
यसवर्षको “अनेसास भवन भट्ट विशिष्ट महिला साहित्य पुरस्कार ” न्युयोर्क निवासी चर्चित महिला साहित्यकार गीता खत्रीले पाउनुहुने भएको छ । बिदेशमा रहेर नेपाली साहित्यमा उहाँले दिनुभएको योगदानको कदर गर्दै पुरस्कार दिन लागिएको जनाइएको छ ।
नेपाली साहित्यलाई विश्वव्यापिकरण गर्न सकारात्मक योगदान दिने एकजना नेपाली महिला साहित्यकारलाई हरेक दुईदुई बर्षमा प्रदान गरिने उक्त पुरस्कार यो बर्ष खत्रीले पाउनुहुने भएको हो । पुरस्कारको स्थापना एनआरएन अध्यक्ष भवन भट्टले गर्नुभएको हो । जसको राशी एक हजार अमेरिकी डलर रहेको छ ।
अनेसास केन्द्रीय कार्यसमितिद्वारा समालोचक लीला लुइँटेलको संयोजकत्वमा गठित विन्दिया सुब्बा र उन्नती बोहरा शीला रहेको पुरस्कार छनोट समितिले साहित्यकार खत्रीलाई पुरस्कारका लागि छनोट गरेको हो ।
मार्च २४ र २५ मा अन्तर्राष्ट्रिय नेपाली साहित्य समाजको आयोजनामा भारतको सिक्किममा हुने तेस्रो अन्तर्राष्ट्रिय नेपाली महिला साहित्यिक सम्मेलनका पुरस्कार प्रदान गरिनेछ ।
हालै गीता खत्रीको कथासंग्रह अन्त्यहीन इच्छा प्रकाशित भएको छ भने तर यस अगाडि खत्रीका पाँचवटा पुस्तक भने प्रकाशित भइसकेका छन् । खत्रीले लेखेका गीतका चारवटा गिती एल्बम समेत बजारमा आइसकेका छन् । झोखाङदेखि मजाटलानसम्म नियात्रासंग्रह, आमा हुन् आमा खण्डकाब्य, सिर्जनायात्रामा गतिा गीतिसंग्रह, सपनाको धरहरा कवितासंग्रह र सिर्जनायात्रामा गीता कविता र गजलसंग्रह खत्रीका यसअघि प्रकाशित कृति हुन् ।