Follow @khasokhasmag

प्रधानमन्त्री निवासको खाजा अब चिया–बिस्कुट


प्रकाशित मिति : आश्विन १०, २०७३ सोमबार

प्रधानमन्त्री निवास बालुवाटारको चिया–खाजा खर्चमा व्यापक कटौती भएको छ । यसअघि बालुवाटारमा महँगा होटल र क्याटरिङबाट खाजा र खाना मगाउने गरिएकोमा अहिले खाजाका रूपमा चिया र बिस्कुट मात्र दिन थालिएको छ । पत्रपत्रिकामा हुने खर्च पनि कटौती भएको छ ।

प्रधानमन्त्री पुष्पकमल दाहालले यसअघि अनावश्यक रूपमा लाखौं रुपैयाँ राज्य कोषको खर्च भएको भन्दै कटौती गर्न निर्देशन दिएका थिए । ‘खाजाकै नाममा थामिनसक्नुको बिल आउन थालेपछि प्रधानमन्त्रीले नै त्यसलाई रोक्न भन्नुभएको थियो,’ प्रधानमन्त्री तथा मन्त्रिपरिषद कार्यालयका प्रवक्ता एवं सहसचिव दामोदर रेग्मीले भने, ‘बालुवाटारमा हुने बैठक, कर्मचारी, सुरक्षाकर्मी, भेट्न आउने आगन्तुक सबैलाई चिया, बिस्कुट, कुकिज मात्र दिन थालिएको छ ।’ अघिल्ला सरकारको पालामा बाहिरबाट मगाइएको खाजा बढी खर्चिलो भएको भन्दै आलोचना भएको थियो ।

यसअघि सोल्टी होटल, अनमोल क्याटरिङ लगायतबाट बालुवाटारमा चिया–खाजा ओसार्ने गरिएको प्रधानमन्त्री तथा मन्त्रिपरिषद कार्यालयको खर्च विवरणमा छ । विवरणअनुसार पछिल्लो पटक गत साउन २० गते भुक्तानीका लागि पेस भएको सोल्टी होटलको बिलमा खाना र खाजाको गरी ७ लाख २४ हजार २ सय ४७ रुपैयाँ खर्च भएको उल्लेख छ । त्यस्तै, अनमोल क्याटरिङले पनि सोही मितिमा ८ लाख ४८ हजार ४२ रुपैयाँको उस्तै शीर्षकको बिल पेस गरेको छ ।

त्यसबाहेक बुद्धनारायण खाद्यान्न सप्लायर्स नामक फर्मले पनि बालुवाटारका लागि खाना, खाजा उपलब्ध गराउँदै आएको विवरणले देखाएको छ । उसले गत भदौ १६ गते मात्र ५ लाख २५ हजार १ सय ६५ रुपैयाँको बिल भुक्तानीका लागि पेस गरेको थियो । ‘ती सबै खर्च यसअघि भएका हुन् । कतिपय भुक्तानी भए । कति भुक्तानीको प्रक्रियामा छन्,’ रेग्मीले भने, ‘अब हामी त्यस्ता शीर्षकमा खर्च हुन्न दिन्नौं ।’

प्रधानमन्त्री निवासका लागि पत्रपत्रिकामा मात्र मासिक १ लाख ६५ हजार खर्च हुँदै आएको थियो । आचार्य ट्रेड एन्ड सप्लायर्सले हरेक महिना त्यति रकम भुक्तानी लिएको देखिन्छ । दाहाल प्रधानमन्त्री बनेयता डेढ महिनाको अवधिमा खाजा/खानामा १ लाख ५८ हजार र पत्रपत्रिकामा ४० हजार रुपैयाँ खर्च भएको प्रधानमन्त्री सचिवालयका उससचिव दिनेश सागर भुसालले जानकारी दिएका कान्तिपुरमा खबर छ ।

‘बालुवाटारको खर्च विवरण सबै उपसचिवको तहबाट अन्तिम भएर आएपछि मात्र हामी भुक्तानीका लागि अघि बढाउँछौं । अनावश्यक खर्च हुन दिँदैनौं,’ प्रवक्ता रेग्मीले भने । सचिवालयमा सरकारीतर्फ यसअघि शाखा अधिकृत तहका कर्मचारीले नेतृत्व गर्थे भने यस पटकदेखि उपसचिव खटाइएको छ ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com