पूर्व गृहमन्त्री घिमिरेको कार त्रिशूलीमा खस्यो
प्रकाशित मिति : आश्विन ९, २०७३ आईतबार
पूर्व गृहमन्त्री माधवप्रसाद घिमिरेसहित सातजना चढेको गाडी आइतबार दिउँसो ४ बजे पृथ्वीराजमार्गको दाह्रेचोक गाविस–३, घोप्टेभिरबाट त्रिशूली नदीमा खस्दा तीन जनाको मृत्यु भएको छ । दुर्घटनामा घिमिरेसहित तीनजना बेपत्ता भएका छन् । चालक विष्णु राई घाइते छन् ।
चितवनका प्रमुख जिल्ला अधिकारी विनोदप्रकाश सिंहका अनुसार मृत्यु हुनेमा घिमिरेकी आमा, आफन्त रामचन्द्र कार्की र सुरक्षागार्ड सशस्त्र प्रहरीका प्रहरी सहायक निरीक्षक नारायण काफ्ले रहेका छन् । उनका अनुसार घिमिरेसहित तीनजना बेपत्ता भएका छन् । मुक्तिनाथबाट पोखरा हुँदै काठमाडौँतर्फ जाँदै गरेको बा ९ च १५३१ नम्बरको स्करपियो गाडी दुर्घटनामा परेको हो । घाइतेलाई उपचारका लागि भरतपुरतर्फ पठाइएको छ भने घटनास्थलमा बेपत्ताको खोजी कार्य जारी रहेको प्रजिअ सिंहले बताए ।
गाडीमा सात जना सवार रहेको र त्यसमध्ये चार जनालाई उद्धार गरिएको जनाइएको छ। चितवन प्रहरी प्रमुख वसन्त कुँवरका अनुसार सात जना सवार गाडीका एक महिलासहित चार जनाको उद्धार गरिएको हो। बृद्ध महिला चैतन्यकुमारी, घिमिरेकी आमा भएको अनुमान गरिएको छ। उनीसहित चालक विष्णु राई, सशस्त्र प्रहरीका हवल्दार आरसी कार्की र नारायणप्रसाद काफ्लेको उद्धार गरिएको प्रहरीले जनाएको छ। तीन जनाको अवस्था गम्भीर छ भने चालक राई बोल्नसक्ने अवस्थामा छन्। घाइते चारै जनालाई भरतपुर अस्पताल ल्याइदै गरेको प्रहरीले जनाएको छ। प्रहरीका अनुसार गम्भीर अवस्थाकाहरुलाई अस्पताल नपुर्याई केही भन्न नसकिने अवस्था छ।
दुर्घटनामा परेको कार तथा बेपत्ताहरूको खोजीका लागि प्रहरी खटिएको छ। खिलराज रेग्मी मन्त्रिपरिषदको अध्यक्ष हुँदा घिमिरे गृहमन्त्री थिए। यसैबीच प्रधानमन्त्री पुष्पकमल दाहालले ट्विट गर्दै घिमिरे सवार गाडी दुर्घटनाले स्तब्ध तुल्याएको जनाउँदै शीघ्र खोजीकार्यका लागि निर्देशन दिएका छन्।