भगवती चौधरी सर्वोच्चमा
प्रकाशित मिति : पुस १२, २०७४ बुधबार
सुनसरी । बहुचर्चित सुनसरी क्षेत्र नं ३ बाट प्रतिनिधिसभा सदस्यका लागि वाम गठबन्धनकी उम्मेदवार भगवती चौधरीले मतपरिणाम बदरको माग गर्दै आज सर्वोच्च अदालतमा मुद्धा दर्ता गराएकी छन् । चौधरीले मतपरिणाम बदर गरी पून मतगणनाको मागसहित सर्वोच्च अदालतको संवैधानिक इजलासमा मुद्धा दर्ता गराएकी हुन् ।
सुनसरी ३ बाट विजयी नेपाली कांग्रेसका विजय गच्छदार, निर्वाचन आयोग केन्द्रीय कार्यालय, मुख्य निर्वाचन अधिकृतको कार्यालय सुनसरी, सुनसरी ३ का निर्वाचन अधिकृतलाई बिपक्षी बनाई नेता चौधरीले मुद्धा दर्ता गराएकी हुन् ।
चौधरीले बिपक्षी गच्छदारलाई प्रतिनिधिसभा सदस्यको सपथ नगराउनु, संघीय संसदको पदधारण गरि कामकाज गर्न नदिनु, निर्वाचनसँग सम्बन्धित मतपत्र लगायतका सम्पूर्ण कागजात सुरक्षित राख्नु भन्दै सर्वोच्च अदालत (संवैधानिक इजलास सञ्चालन) नियमावली २०७२ को नियम १९ को उपनियम ४ बमोजिम आदेश जारी गर्न माग गरेकी छन् ।
गत मंसीर २१ गते भएको निर्वाचनमा सुनसरी क्षेत्र नम्वर ३ मा नेपाली काँग्रेसका उम्मेदवार उपप्रधानमन्त्री विजय कुमार गच्छेदार ३२१ मतले विजयी भएका थिऐ । एमाले उम्मेदवार चौधरीले भने आफूलाई जनताले जिताए पनि गच्छेदारले षडयन्त्र गरेर सत्ता र शक्तिको आडमा हराएको बताउँदै आएकी छन् ।