म्यादी प्रहरी नै आन्दोलनमा उत्रिए, वीरगञ्जमा चक्काजाम
प्रकाशित मिति : मंसिर २८, २०७४ बिहीबार
२८ मंसिर, वीरगञ्ज । प्रदेश तथा प्रतिनीधि सभा निर्वाचनका लागि पर्सामा खटिएका म्यादी प्रहरीहरुले बिहिबार वीरगञ्जमा चक्काजाम गरेका छन् । जिल्ला प्रहरी कार्यालय पर्साले राज्यले तोकेको भन्दा कम सेवा सुविधा दिन लागेको भन्दै उनीहरु आन्दोलित भएका हुन् ।
उनीहरुले जिल्ला प्रहरीमा गएर गुनासो गर्दा कुनै सुनुवाई नभएको भन्दै घण्टाघर चोकमा दिउँसो साढे ३ बजेबाट चक्का जाम गरेका छन् ।
पहिलो चरणमा खटिएका म्यादी प्रहरीहरुलाई ६२ हजार दिएको भएपनि पर्सामा ४८ हजार मात्रै दिन लागेको आरोप उनीहरुले लगाएका छन् । पहिलो चरणको चुनावमा वितरण भए अनुसारकै पारिश्रमिक आफूहरुले पनि पाउनुपर्ने माग उनीहरुको छ ।
पहिलो चरणमा खटिएका म्यादी प्रहरीहरुलाई भन्दा कम पारिश्रमिक दिन लागेपछि विरोध जनाएको म्यादी प्रहरी पि्रन्स मुखियाले बताए । ‘हामीलाई कम पारिश्रमिक दिने कुरा भएपछि हामीले विरोध जनाएका थियौं । प्रहरीले उल्टै लाठि चार्ज गरेर हामीलाई लखेटेपछि चक्काजाम गर्न बाध्य भयौं’ उनले भने ।
५५ दिनका लागि खटाईने उनीहरुले २० दिन काम गरे वापत पहिलो किस्ता २४ हजार पाईसकेका छन् भने अब ३५ दिन खटेको रकम पाउन बाँकी छ । कात्तिक ३ गतेबाट खटेको भएपनि नियुक्तीपत्र कात्तिक १२ गतेदेखि मात्रै रहेको म्यादी प्रहरीहरुको गुनासो छ ।
पर्साका प्रहरी उपरीक्षक डा गणेश रेग्मीले भने म्यादी प्रहरीहरुले नबुझेका कारण समस्या सृजना भएको बताए । ‘कुनै एउटा अनलाइनले लेखेको गलत समाचारको आधारमा उनीहरुले हाहल्ला गरेका छन्’ उनले भने, ‘राशन भत्ताका कारण हिमाली, पहाडी र तराईका जिल्लामा रकम केहि तलमाथी हुन्छ, राज्यले तोकको पारिश्रमिक सिधै उनीहरुको खातामा जान्छ ।’
जिल्ला प्रहरी कार्यालयले २० दिन काम गरेको रकम उनीहरुको खातामा गइसकेको र ३५ दिनको पारिश्रमिक अब खतामा पठाईने जनाएको छ । प्रदेश र प्रतिनीधि सभा निर्वाचनका लागि पर्सामा एक हजार ८ सय १६ जना म्यादी प्रहरी छनौट गरिएको थियो ।