बेनी अस्पतालको पचास शैया क्षमत्ताको भवन निर्माण कार्य सुरु
प्रकाशित मिति : मंसिर २८, २०७४ बिहीबार
मंसिर २८, म्याग्दी,। म्याग्दीको सदरमुकाममा रहेको बेनी अस्पतालको पचास शैया क्षमत्ताको सुबिधासम्पन्न भवन निर्माण सुरु भएको छ ।
दुई वर्षअघि क्षमत्ता विस्तार भएको अस्पतालको नयाँ भवन निर्माण कार्य सुरु भएको हो । सहरी आवास तथा भवन निर्माण डिभिजन कार्यालय बागलुङले ठेक्का मार्फत भवन निर्माणको काम सुरु गरेको हो ।
चार हजार ९६३ वर्गमिटर क्षेत्रफलमा निर्माण हुने ४ तले भवन बनाउने ठेक्का महादेव खिम्ती ज्वाला सफीना जेभीले पाएको छ । वि।स २०७३ मंसिर २१ गते ठेक्का सम्झौता भएको भवनको एक वर्षपछि मंगलबार शिलन्यास गरिएको छ ।
बेनी अस्पताल विकास समितिका अध्यक्ष माधवप्रसाद रेग्मी र जिल्ला स्वास्थ्य प्रमुख बरिष्ठ चिकित्सक रोशन न्यौपानेले शिलन्यास गरेका हुन् । डिभिजनका ईञ्जिनियर प्रकाश अर्यालले भ्याटसहित १८ करोड ८४ लाख आठ हजार ८९ रुपैयाँँमा भवन निर्माणका लागि ठेक्का सम्झौता भएको जानकारी दिए ।
सर्वेक्षणका क्रममा २४ करोड चार लाख २९ हजार, ८६९ रुपैयाँ लागत अनुमान गरिएको थियो । २०७६ मंसिर २० गतेभित्र भवन निर्माण सम्पन्न गर्ने लक्ष्य रहेको छ । भूकम्प प्रतिरोधी क्षमत्ताको भवन अपाङ्ग मैत्रीसमेत हुनेछ ।
भुइँतलामा लोन्डरी, मोर्टुअरी, किचन, पहिलो तलामा ईमरजेन्सी, ल्याब, रेडियोलोजी, पहिलो तलामा अपरेशन थियटर, बहिरंग सेवा र अन्तिम तलामा प्रशासन रहने जनाइएको छ । यो भवन म्याग्दीमा हालसम्म निर्माण भएका मध्य सबैभन्दा ठूलो र धेरै लागतको भएको इञ्जिनियर अर्यालले बताए ।
अस्पताल भवनसँगै चारचार परिवार नर्स र डाक्टरको आवास भवन निर्माणका लागि समेत ठेक्का सम्झौता भएको छ । अस्पतालको पुरानो भवन रहेको ठाउँमा नयाँ भवन निर्माण हुन लागेको हो । पुरानो भवनबाट दिँदै आएको सेवा जिल्ला स्वास्थ्य कार्यालयको नयाँ भवनबाट दिने व्यवस्था मिलाइएको अस्पताल विकास समितिका अध्यक्ष माधवप्रसाद रेग्मीले बताए ।
दुई वटा अस्थाई भवन निर्माण कार्य अन्तिम चरणमा पुगेको छ । पुरानो संरचना भत्काएर काम सुरु गर्न केही ढिलाई भएपनि निर्धारित समयमै सम्पन्न गर्ने गरी काम अघि बढाउने निर्माण व्यवसायी रवीन जोशीले बताए । १५ शैया क्षमत्ताको अस्पताल २०७२ मा पचास शैयामा स्तरउन्नति भएको थियो ।
५० शैयामा स्तरउन्नति भएपछि अस्पतालमा भवन निर्माण र उपकरणको व्यवस्थापनको काम भैरहेको जिल्ला स्वास्थ्य प्रमुख डाक्टर रोशन न्यौपानेले बताए ।