गाई काटेको अभियोगमा सात जना पक्राउ
प्रकाशित मिति : मंसिर २६, २०७४ मंगलबार
मंसिर २६, दाङ, गाई कोटेको अभियोगमा मंगलबार सात जना पक्राउ परेका छन् ।
राजपुर गाउँपालिका वडा नम्बर ७ डगमारामा तीनवटा गाई काट्दै गरेको अवस्थामा उनीहरुलाई पक्राउ गरिएको जिल्ला प्रहरी प्रमुख एसपी दुर्गा सिंहले जानकारी दिएकी छिन् । स्थानीय ३९ वर्षीय वीरसिंह थापासहित तीन महिला र चार पुरुष पक्राउ गरेको उनले बताइन् ।
एक जनाको मात्रै नाम खुलाइएको र अन्यबारे अनुसन्धान भइरहेकाले नाम सार्वजनिक नगरिएको सिंहले बताइन् । घटनास्थलबाट एकथना भरुवा बन्दुकसमेत बरामद भएको एसपी सिंहले जानकारी दिएकी छिन् ।
गाई काटेर सुकुटी बनाउने र जरायोको सुकुटी भनेर बिक्री गर्ने गरेको अनुसन्धानबाट खुलेको उनले बताइन् । अस्थायी प्रहरी पोस्ट डगमाराबाट असई गोविन्दबहादुर थापाको नेतृत्वमा गएको गस्ती टोलीले गाई काटिरहेको अवस्थामा उनीहरुलाई पक्राउ गरेको थियो ।