कास्कीमा रवीन्द्र अधिकारीको ‘ह्याट्रिक’
प्रकाशित मिति : मंसिर २३, २०७४ शनिबार
यसअघिका दुइटै संविधान सभाको निर्वाचन जितेका एमालेका रबिन्द्र अधिकारी कास्की क्षेत्र नम्बर दुईमा प्रतिनिधि सभा सदस्यमा बिजयी भएका छन । उनले कांग्रेसका देवराज चालिसेलाई ८ हजार ५ सय ४६ मतले पराजित गरे ।
एमाले केन्द्रीय सदस्यसमेत रहेका अधिकारीले २७ हजार २ सय ७ मत पाए । निकटतम प्रतिद्वन्द्वी कांग्रेसका चालिसेले १८ हजार ६ सय ६१ मत पाए । यसको निर्वाचन अधिकृतको कार्यालयबाट घोषणा हुन भने बाँकी छ । अधिकारीले २०६४ र २०७० को संविधान सभाको निर्वाचनमा जित हासिले गरेका थिए । ह्याट्रिक गरेर अधिकारीले कास्कीको निर्वाचनमा ईतिहास रचेका छन । संविधान सभाका दुवै निर्वाचनमा चार क्षेत्र रहेका कास्कीमा यसपटक भने तीन क्षेत्रमात्रै कामय भएको थियो । पहिला क्षेत्र नम्बर तीनमा चुनाव जितेका अधिकारी यसपटक भने कास्की क्षेत्र दुईमा लडेका थिए । यसपटकको चुनावमा दुई पार्टीका ‘शक्तिशाली’ उम्मेदवार भएकाले कास्की दुई क्षेत्रको निर्वाचनलाई रोचकसाथ हेरिएको थियो ।
महाधिवेशन प्रतिनिधि रहेका चालिसे ४० वर्षदेखि पार्टीमा क्रियाशिल थिए । ६ महिना अघिमात्रै प्राध्यापन पेशाबाट राजीनामा दिएका चालिसेले पृथ्वीनारायण क्याम्पसमा पढाउँथे । बिजयी अधिकारी संसदको बिकास समितिका सभापति भइसकेका छन । दुवै प्रतिस्पर्धी बिद्यार्थी राजनीतिबाट उदाएका व्यक्तित्व हुन ।