२६ जिल्लाका मतपेटिका सदरमुकाममाः आयोग
प्रकाशित मिति : मंसिर १२, २०७४ मंगलबार
प्रतिनिधि सभा र प्रदेश सभाको पहिलो चरणको मतदान सम्पन्न भएका ३२ मध्ये २६ जिल्लाका मतपेटिका जिल्ला सदरमुकाम ल्याइएको निर्वाचन आयोगले जनाएको छ।
बाँकी ६ जिल्लाका ७१ मतदान स्थलका मतपेटिका सदरमुकाम ल्याउने कार्य भइरहेको अधिकारीहरुले बताएका छन्।
आयोगका अनुसार २ हजार ९ सय १७ मतदान स्थलमध्ये अब संखुवासभाका ९, भोजपुरका ६, डोल्पाका २०, मुगुका १०, जाजरकोटका २५ र दार्चुलाका एक गरी ७१ मतदान स्थलका मतपेटिका सदरमुकाममा संकलन हुने क्रममा छन्।
छ वटै जिल्लाका बाँकी मतपेटिकालाई सडकमार्ग र हवाईमार्गबाट ल्याउने काम भइरहेको आयोगद्वारा जारी विज्ञप्तिमा उल्लेख छ।
मतपेटिका “विशेष सुरक्षा निगरानीमा” राखिने
निगरानी
मंगलवार साँझसम्ममा बाँकी मतपेटिकाहरु सदरमुकाम पुर्याइसकिने आयोगले जनाएको छ।
आइतवार प्रतिनिधि सभा तथा प्रदेश सभा सदस्य चुन्न पहिलो चरणको मतदान भएको थियो।
आइतवार निर्धारित ४ हजार ४ सय ६५ मतदान केन्द्रमध्ये दुईवटा मतदान केन्द्रमा मात्रै पुन: निर्वाचन गरिनुपर्ने आयोगले बताएको छ।
आयोगले दोस्रो चरणको चुनाव नहुञ्जेल मतपेटिकाहरुलाई ‘विशेष सुरक्षा निगरानीमा’ राखिने जनाएको छ।