चितवनको माडीलाई मणि बनाउने प्रचण्डको उद्घोष


प्रकाशित मिति : मंसिर ११, २०७४ सोमबार

चितवन : माओवादी केन्द्रका अध्यक्ष तथा चितवन क्षेत्र नम्बर-३ बाट प्रतिनिधिसभा सदस्यका उम्मेदवार पुष्पकमल दाहाल, ‘प्रचण्ड’ले दक्षिण चितवनको माडीलाई मणि बनाउन सकिने प्रशस्त सम्भावना रहेको बताएका छन्। चितवनको माडीमा चुनावी प्रचार अभियानका क्रममा रहेका अध्यक्ष दाहालले सोमबार माडी नगरपालिका वडा नम्बर ५ स्थित ढिकुरबारीमा भएको चुनावीसभाका क्रममा यस्तो बताएका हुन्।

दाहालले भने,े ‘राम्रोसँग राज्यको तर्फबाट र राजनीतिक दलहरुको तर्फबाट, सामाजिक संघसंस्था र नागरिकको तर्फबाट सामूहिक प्रयास गरियो भने चितवनको माडीलाई चाहिँ चितवनको मणि बनाउन सकिन्छ।’ त्यसको लागि थुप्रै सम्भावनाहरु माडीमा रहेको उनले औँल्याए। कृषिमा आधुनिकीकरण र विविधिकरण गर्न प्रचुर सम्भावना माडीमा रहेको दाहालको भनाइ छ।

यस्तै, तटबन्ध गरेर नदी खोलाहरुलाई नियन्त्रण गर्न सकिने पूरै सम्भावना रहेको समेत उनले बताए। माडी बर्सेनि बाढीले प्रभावित पार्दै आएको निकुञ्ज पारीको उपत्यका हो। चितवन राष्ट्रिय निकुञ्ज माडी र चितवनकै लागि बरदान भएको उल्लेख गर्दै अध्यक्ष दाहालले अहिलेको व्यवस्थापनको स्थिति हेर्दा ठूलो कठिनाइ देखिएको भन्दै यसलाई व्यवस्थापन गर्न सकिने जिकिर गरे।

उनले निकुञ्जलाई असर नपर्ने गरी माडी ठूलो परियोजनाअन्तर्गत आकासे पुल या सुरुङमार्ग बनाएरु अघि बढ्न सकिने र त्यो विषय जनताको बीचमा प्रतिबद्धतासमेत गरिसकिएको उनको भनाइ थियो। तीन दिनदेखि अध्यक्ष दाहाल चितवनको चुनावी प्रचार अभियानमा छन्। वाम गठबन्धनबाट उम्मेदवार रहेका दाहालको प्रतिस्पर्धी रहेका लोकतान्त्रिक गठबन्धनबाट राप्रपा (प्रजातान्त्रिक)का उपाध्यक्ष विक्रम पाण्डे पनि चुनावी प्रचार अभियानमा छन्।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com