गृहमन्त्रीको जिम्मेवारी खोसेर प्रधानमन्त्रीले सिडियो र प्रहरी सरुवा गरेको नेम्बाङको आरोप
प्रकाशित मिति : मंसिर १०, २०७४ आईतबार
नेकपा एमालेका नेता तथा पूर्वसभामुख सुभाषचन्द्र नेम्बाङले वर्तमान सरकारले निर्वाचन आचारसंहिताविपरीत समाजमा त्रास फैलाउने काम गरेको आरोप लगाएका छन्। झापाको बिर्तामोडमा आइतबार प्रेस चौतारी झापाले आयोजना गरेको संक्षिप्त पत्रकार भेटघाट कार्यक्रममा पूर्वसभामुख नेम्बाङले चुनावको मुखमा प्रधानमन्त्रीले नै गृहमन्त्रीको जिम्मेवारी लिएर निर्वाचन आचारसंहिताविपरीत प्रहरी, सिडियो र कर्मचारी वढुवा र सरुवा गराउने चलखेलमा लागेर समाजमा त्रास फैलाउन काम गरिरहेको आरोप लगाएका हुन्।
चुनाव विथोल्ने जुन प्रकारको बम पडकाएर समाजमा आतंक फैलाउने काम भइरहेको छ, त्यस्तो आतंकबाट जनता आत्तिएका छैनन्, नेम्बाङले भने, ‘उनीहरु ढुक्क भएर मतदान गर्नेमा आफु विश्वस्त रहेको बताए।’ इलाम क्षेत्र नम्बर २ बाट प्रतिनिधिसभा सदस्यका उम्मेदवार बनेका नेम्बाङले भने, ‘वाम गठबन्धनको चुनावी एकताले सरकारमा बसेका नेपाली कांग्रेसलगायत दलभित्र ठूलै हलचल भएको छ।’
‘चुनावमा वाम गठबन्धनले बहुमत ल्याए भने, बस्न, सुत्न, खान र रुनसमेत नपाउने भन्दै जनतामाझ गठबन्धनविरुद्ध चर्को आलोचना गर्ने थालेका छन्, उनले भने। चुनावअघि प्रधानमन्त्रीको कुर्सी हत्याउने गरी गठबन्धन हुने गरेको बिषयमा चर्चा गर्दै उनले भने, वाम गठबन्धन प्रधानमन्त्रीको कुर्सी हत्याउनका लागि गठबन्धन नगरेको प्रस्टाउँदै देशलाई आगामी पाँच वर्षभित्र विकास र समृद्धिको बाटोमा लैजानलाई गठबन्धन भएको बताए। चुनाव सम्पन्न भएलगत्तै देश र जनताको चाहनाबमोजिम एमाले र माओवादी केन्द्र पार्टी एकीकरण भएरै छाड्नेमा समेत उनले जोड दिए। अस्थिर सरकारलाई स्थायित्व दिन वाम गठबन्धन अगाडि बढेको उनले प्रस्ट पारे।