नेपालमा अन्तिम क्षण विताउने इच्छा राखेका एलेक्सप्रति न्युयोर्कमा श्रद्धाञ्जली
प्रकाशित मिति : मंसिर ४, २०७४ सोमबार
जीवनको अन्तिम क्षण नेपालमा विताउने इच्छा राख्नुभएका नेपाल प्रेमी अमेरिकी नागरिक एलेक्स गार्गिलिसप्रति श्रद्धाञ्जली व्यक्त गरिएको छ । आज न्युयोर्कको हिमालयन याक रेष्टुरेण्टमा आयोजित कार्यक्रममा एलेक्सप्रति श्रद्धाञ्जली व्यक्त गरिएको हो ।
एलेक्स गार्गिलिसको न्युयोर्कमा रहेको एल्महस्र्ट अस्पतालमा उपचारका क्रममा उहाँको निधन भएको थियो । जीवनको अन्तिम क्षण नेपालमा विताउने इच्छा राख्नुभएका एलेक्सको त्यो इच्छा भने पूरा हुन पाएन । उहाँले झण्डै ३० बर्ष नेपालमा बिताउनुभएको थियो ।
‘दि वर्ल्ड इज माई नेसन’ नामको आफ्नो पुस्तकमा नेपाल जत्तिको सुन्दर राष्ट्र अरु नभएको र नेपालबाहेक अरु राष्ट्रले मनमा नछोएको उल्लेख गर्नु भएका एलेक्सले विश्व यात्राका क्रममा आफ्नो बसाईका लागि नेपाल रोज्नुभएको थियो ।
नेपालमा झण्डै ३ दशक विताउने क्रममा उहाँ ललितकला क्याम्पस लगाएत अन्य क्षेत्रमा संलग्न भई नेपाली कलासाहित्यको विकासमा प्रेरणादायी भूमिका निभाउनु भएको थियो । मनमा नेपाल प्रतिको माया बोक्नुभएका एलेक्स न्युयोर्कमा हुने नेपाली कला र संस्कृतिको प्रबद्धन गर्ने कार्यक्रममा समेत उपस्थीत हुदै आउनुभएको थियो ।
बिष्णुमान प्रधानले एलेक्सलाई एक अविस्मरणिय महान ब्यक्तित्व, कलाकार, लेखक, शिक्षक, नृत्यकार, बहुभाषी, विश्व यात्री, प्रेरणाको श्रोतका रुपमा स्मरण गर्नुभएको छ । एलेक्सको अन्तिम संस्कार गत शुक्रबार दिउसो पौने १ बजे फ्रेस पाउण्ड सिमेट्रीमा गरिएको थियो ।
एलेक्सले आफूलाई विश्वकै नागरिक बताउनुहुन्थ्यो भने उहाँले नेपाल, बेलायत र फ्रान्सको स्थायी बासिन्दाका रुपमा कागजपत्र प्राप्त गर्नुभएको थियो । नेपाल र नेपाली भनेपछि हुरुक्कै हुने तथा नेपाललाई असाध्यै माया गर्ने एलेक्सले काठमाडौंको गुरुकुल थियटरमा नाटक समेत सिकाउनुभएको थियो ।
कलाकारहरु सौगात मल्ल, पूर्व मिस नेपाल उषा खड्की, आरजे भीजे पूजा गुरुङ, कलाकार अनुप बराल, निशा शर्मा लगायतका कलाकारहरु उहाँका विद्यार्थी हुनुहुन्थ्यो । डाक्टर अभि सुवेदी र बारबरा एडम्सका साथी समेत रहनुभएका एलेक्सले विश्वका सुन्दर सहरहरुका बारेमा भर्खरै पुस्तक लेखेर सकाउनुभएको थियो । जुन प्रकाशन हुन बाँकी छ ।