Follow @khasokhasmag

एनआरएनए अध्यक्ष भवन भट्टले निगमलाई बुझाएनन् विमानको रकम


प्रकाशित मिति : कार्तिक ३०, २०७४ बिहीबार

३० कात्तिक, काठमाडौं । गैरआवासीय नेपाली संघका अध्यक्ष भवन भट्टले नेपाल वायुसेवा निगमको बोइङ ७५७ विमान खरिद गर्ने प्रक्रिया अगाडि बढाएको महिना दिन बित्यो । ३० असोजमा भएको संघको चुनावअघि उनले एक करोड ५० लाख रुपैयाँ बुझाएका थिए । तर, एक साताभित्र बुझाउनुपर्ने बाँकी रकम अझै निगमले पाएको छैन ।

निगमका प्रवक्ता रविन्द्र श्रेष्ठका अनुसार, एक साताभित्र बाँकी रकम बुझाउन सम्झौतासहित बीबी एयरवेजलाई विमान बिक्री गर्ने निर्णय भएको थियो ।

‘म्याद गुज्रिसक्यो, सम्पर्क पनि हुन सकेको छैन । बाँकी रकम बुझाउने/नबुझाउने भन्ने कुनै निर्णय पनि आएको छैन,’ श्रेष्ठले भने ।

संघको चुनावका बेला भट्टले जहाज खरिद गरेको समाचार सार्वजनिक भएको थियो ।

अग्रिम रकम बुझाएर उनी सम्पर्कविहीन भएपछि निगमका लागि बोइङ–७५७ फेरि टाउको दुखाइको विषय बनेको छ । ३/४ पटकसम्म गरिएको बोलपत्र आह्वानको उपलब्धि देखिएको छैन ।

बीबी एयरवेजलाई विमान बिक्री गर्ने निर्णय वार्ताको माध्यमबाट लिइएको थियो ।

आगामी बोर्ड बैठकबाट उक्त विमानबारे निर्णय लिइने श्रेष्ठले बताए । उनका अनुसार निगमले भट्टलाई १४ लाख ६० हजार अमेरीकी डलर अर्थात् १५ करोड १८ लाख रुपैयाँमा विमान बिक्री गरेको थियो ।

त्यसमध्ये डेढ करोड रुपैयाँ बुझाए । बाँकी १३ करोड ६८ लाख रुपैयाँ बुझाउने अत्तोपत्तो छैन ।

भवनले सन् २०१२ को अक्टुबरमा वेट लिज बिमानमार्फत् बीबी एयरवेजको उडान सुरु गरेका थिए । सातामा चार दिन मलेसिया उडान सुरु गरेपनि उनले लिजमा लिएको बिमानको भाडा समयमै नतिरेका कारण दुई महिनामै कम्बोडियन कम्पनीले बिमान फिर्ता लगेको थियो । त्यसयता बीबी एयरवेज नाम मात्रको एयरलाइन्सका रुपमा रहेको छ, उडान सञ्चालन गर्न सकेको छैन् ।

चुनाव अगाडी प्रचारका लागि सो बिमान किन्ने भनिएपनि बिमान ममर्त गर्न झण्डै ८० करोड रुपैयाा  खर्च हुने भएका कारण भवन बिमान किन्ने योजनालाई अगाडी बढाउन नखोजेको बुझिएको छ ।

उक्त विमान १७ करोड रुपैयाँमा बिक्री गर्ने निगमको शुरुवाति योजना थियो । तर, तोकिएको रकम कबोल गर्दै कुनै कम्पनीको आवेदन आएन । सोही कारण बीबी एयरवेजसँग वार्ताबाटै सम्झौतामा पुगेका थिए, निगमका अधिकारीहरु ।

सन् १९८७ मा खरिद गरिएको उक्त विमानको मर्मत खर्च बढ्दै जाने र लागतअनुसार नाफा पनि नहुने देखेपछि निगमले बिक्री गर्ने निर्णय लिएको हो । नयाँ इन्जिन फेर्न मात्र एक अर्ब ५० करोड रुपैयाँभन्दा बढी खर्च हुन्छ ।

उक्त विमान चैत ०७२ देखि ग्राउन्डेड भएर थन्किएको छ । बोइङ ७५७–२०० सिरिजको विमानको दर्ता नम्बर हो, नाइन एन–एसीए । उक्त विमानले हालसम्म ८६ हजार चार सय १० घण्टा उडान भरेको छ ।

निगमका एक अधिकारीका अनुसार उक्त विमान अब यात्रु ओसारपसारका लागि योग्य छैन । कार्गाेका लागि प्रयोग गर्न भने सकिन्छ ।

निगमसँग दुई वटा एयरबस–३२०–२०० सिरिजका विमान छन् । तीमध्ये एउटा जहाज हालै मर्मत गरेर फर्केको छ ।

निगमले एयरबसबाटै दुई वटा वाइड बडी विमानको खरिद प्रक्रिया अगाडि बढाएको छ । थप न्यारो बडी विमान ल्याउने योजनामा छ निगम ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com