Follow @khasokhasmag

टीपीएस प्राप्तकर्ताले ग्रिनकार्ड पाउनसक्ने नयाँ विधयेक ल्याइदै


प्रकाशित मिति : कार्तिक २७, २०७४ सोमबार

ट्रम्प प्रशासन टेम्पोरेरी प्रोटेक्टेड स्टेटस टीपीएस अन्त्य गर्ने पक्षमा देखिएको र डिपार्टमेन्ट अफ होमल्याण्ड सेक्युरिटीकी कार्यकारी सेक्रेटरी एलेन ड्युकले टीपीएसबारे स्थायी समाधान खोज्न सदनलाई आब्हान गरेको सन्दर्भमा तीनजना सांसदहरुले टीपीएस प्राप्त गरेकाहरुले ग्रिनकार्डका लागि आवेदन दिनसक्ने प्रावधान सहितको विधयेकको तयारी गरिरहेका छन् ।

एस्पायर एक्ट नाम दिइएको यो विधयेक पारित भएमा टीपीएस प्राप्तकर्ताहरुले ग्रिनकार्डका लागि आवेदन दिन सक्नेछन् । तर उनीहरुले स्वदेश फर्कनुपरेमा चरम कठिनायीको सामना गर्नुपर्ने कुरा न्यायाधिस समक्ष प्रमाणित गर्नुपर्ने हुन्छ । विधयेक पारित भएमा सन् २०१७ को जनवरी १ भन्दा अगाडि टीपीएस प्राप्त गर्नेहरुले स्वेदश फर्केमा चरम कठिनायीको अवस्था सामना गर्नुपर्ने दावी गर्दै ग्रिनकार्डका लागि आवेदन दिन सक्नेछन् ।

न्युयोर्ककी डेमोक्रेटिक कँग्रेसम्यान एभेट क्लार्कले मायामीका रिपब्लिकन प्रतिनिधी एलियाना रस लेटिनेन र वासिंटनका डेमोक्रेटिक प्रतिनिधी प्रमिला जयपालसँग मिलेर विधयेक पेश गर्ने तयारी गरिरहेकी छिन् । त्यो बाहेक चरम कठिनायी प्रमाणित गर्न नसक्नेहरुले पनि अमेरिकामा ६ बर्ष बस्न पाउनेगरी सुविधा पाउनेछन् तर उनीहरु अमेरिकामा कम्तीमा ५ बर्ष टीपीएसमा रहेको हुनुपर्नेछ । यो विधयेक पारित भएमा उनीहरुले हरेक १८ महिनामा टीपीएस रिन्यु गर्ने झन्झट वा खारेज हुने डरबाट मुक्त हुनेछन् ।

एभेट क्लार्कको यो प्रस्ताव मायामीका रिपब्लिकन प्रतिनिधि कार्लोस कर्बेलोको दुईसात अगाडि ल्याएको विधयेक भन्दा पनि विस्तृत हुनेछ । कर्बेलोले ल्याएको विधयेकमा हैटी, निकारागुवा, साल्भाडोर र होण्डुरसका सन् २०११ को जनवरी १३ भन्दा अगाडि आएका आप्रवासीहरुलाई अमेरिकामा स्थायी रुपमा बसोबासका लागि बाटो खोल्छ तर उनले ल्याएको बिलले नेपाल, सोमालिया, साउथ सुडान, सिरिया र यमनका टीपीएसप्राप्त आप्रवासीहरुलाई भने समेट्दैन । कर्बेलोको बिलमा पनि रिपब्लिकन प्रतिनिधीहरु एलियाना रस लेटिनेन र मारियो डियाज बलार्टले हस्ताक्षर गरेका छन् ।

तीनजनै रिपब्लिकन प्रतिनिधीहरुले ल्याएको यो बिल भन्दा रिपब्लिकन प्रतिनिधीसँग मिलेर न्युयोर्कका डेमोक्रेटिक कँग्रेसम्यान एभेट क्लार्कले ल्याउन लागेको एस्पायर एक्ट बढी प्रगतिशिल रहेको छ । यो विधयेकले गैर कानुनी रुपमा अमेरिका छिरेका टीपीएस प्राप्तकर्ताहरुलाई स्टेटस एड्जस्ट अर्थात् ग्रिनकार्डका लागि आवेदन दिंदा स्वेदश फर्केर पुन अमेरिका आउनुपर्ने झन्झटबाट मुक्त गर्नेछ । टीपीएस प्राप्त गरेको व्यक्तिलाई इन्सपेक्सनबाट अमेरिका छिरेको व्यक्तिसरह मान्यता दिने प्रावधान विधयेकमा छ । केही सर्किट कोर्टहरुले यसअगाडि नै गैरकानुनी रुपमा अमेरिका छिरेका टीपीएस प्राप्त व्यक्तिले अमेरिकामा नै रहेर स्टेटस एड्जस्ट गर्नसक्ने फैसला समेत गरिसकेका छन् ।

एभेट क्लार्कको कार्यालयले यो विधयेकप्रति रिपब्लिकनहरुको पनि आकर्षण हुनसक्ने अपेक्षा गरेको छ । किनभने यो विधयेकलाई टीपीएस प्राप्तकर्ताहरुलाई स्वत ग्रिनकार्डको बाटोमा लैजाने नभई न्यायाधिससमक्ष स्वदेश फर्केमा चरम कठिनायीको सामना गर्नुपर्ने अवस्था पुष्टी गनुपर्ने प्रावधान राखेको छ ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com