तरकारी बेचेर करोडपति बन्न सफल


प्रकाशित मिति : कार्तिक २६, २०७४ आईतबार

कात्तिक २६, कास्की । पोखराको चिप्लेढुंगामा तरकारी बेच्न सुरु गरेका कानुनका विद्यार्थी रामकृष्ण दवाडीले तरकारी व्यापार गर्दा मान्छेले खिसी गर्थे, धेरैले उनलाई कानुन पढ्न गएको, गोलभेंडा बेच्न जान्ने भएर आएछ भनेर जिस्क्याउथे । कसैले त उनलाई पागल पनि भने ।

मिहिनेत गरे सफल भइन्छ भन्ने आत्मविश्वासका साथ अगाडि बढेका दवाडीलाई यही व्यवसायले अहिले करोडपति बनाएको छ । उनी अहिले सफल व्यापारीका रुपमा चिनिन्छन् ।

वि.सं.०५२ मा सटर भाडामा लिएर तरकारी बिक्री थाल्दा उनीसँग आत्मविश्वास मात्र थियो । त्यही आत्मविश्वासले आज सफल बनाएको छ, दवाडीलाई ।
शान्ति वन वाटिकास्थित कृषि उपज बजारमा ‘ताजा तरकारी’ नामक थोक तथा खुद्रा पसल छ, अहिले उनको । र, दैनिक लाखौंको कारोबार हुन्छ ।

काठमाडौंको ल क्याम्पसबाट आईएल उत्तीर्ण गरेका धादिङमा जन्मेका दवाडीले बीएल पढ्दापढ्दै सात वर्ष एनजीओको जागिर खाए । सोही क्रममा ५२ वटा जिल्ला घुमे ।

त्यही घुमघामले उनलाई तरकारी व्यवसायमा भविष्य देखाएको थियो । तर, हुँदाखाँदाको जागिर छाडेर उनले व्यवसाय शुरु गरे । जागिर छोड्दा उनलाई सञ्चयकोष, तलबभत्ता गरी एक लाख रुपैयाँ आयो । त्यही पैसाले तरकारी पसल खोले ।

‘छँदाछँदाको जागिर छोड्नु ठीक होइन तर आफ्नो इच्छाशक्तिलाई मार्नु हुँदैन,’ उनी भन्छन् । उनले ठेलामा तरकारी बेच्नेदेखि बोक्नेसम्मको काम गरे ।

त्यतिबेला व्यवसायमा चुनौती थियो । ‘तरकारी बेच्ने काम मधेशी मूलका मानिसले गर्ने हो भन्थे । पहाडी मूलका तरकारी व्यवसायी थिएनन्,’ उनी भन्छन्, ‘पहिले मलाई कानुन पढेको गोलभेंडा व्यापारी भनेर जिस्क्याउँथे । अहिले मसँगै सल्लाह र सहयोग माग्न आउँछन् ।’

अहिले उनले पोखरा १० मा घर बनाएका छन् । परिवार खुशी छ । छोराछोरीलाई राम्रो कलेज र बिद्यालयमा पढाएका छन् । सकारात्मक सोचले नै हो, उनलाई पछाडि फर्केर हेर्नु परेको छैन ।
उनी सामाजिक काममा पनि क्रियाशील छन् । पोखरा थोक व्यवसायी संघ, कृषिउपज बजार सञ्चालक समितिको अध्यक्ष भएर काम गरिसकेका छन् । व्यावसायिक कृषिमा प्रोत्साहन गर्न बागलुङ र पर्वतका केही युवालाई दवाडीले सहयोग पनि गरेका छन् ।

ती युवाले अहिले करिब ७० रोपनीमा व्यावसायिक तरकारी लगाएका छन् । त्यसका लागि मल, बीऊ र बजारीकरणको व्यवस्था पनि दवाडीले नै मिलाइदिन्छन् । उनले लाहाचोकमा तरकारी संकलन केन्द्र निर्माणका लागि पनि सहयोग गरेका छन् ।

उनलाई तरकारी फलाउने र बिक्री गर्नेबीच समन्वय हुनुपर्ने भन्ने लाग्छ । विभिन्न समितिमा रहेर काम गर्दा त्यही मुद्दा उठाएका थिए । उनले किसान, व्यवसायी र उपभोक्ताबीचको दूरी घटाउनुपर्ने बताउँछन् ।

किसानको मेहनत खेर जान नदिने र मौका पाउँदा व्यापारीले पनि ढाड सेक्ने काम गर्न नहुने उनको भनाइ छ । सानो लगानीबाट पनि काम थालेर ठूलो र प्रतिष्ठित बनाउन सकिन्छ भन्ने आत्मविश्वास राख्न उनी युवालाई आग्रह गर्छन् र त्यस क्षेत्रमा उदारहणीय
पात्र बन्न सफल दवाडीलाई यस व्यवसायले आत्मसन्तुष्टि मिलेको छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com