युरोपमा हत्या गरिएका जीसीका परिवारलाई सहयोग
प्रकाशित मिति : कार्तिक २१, २०७४ मंगलबार
पोर्चुगलमा छुरा प्रहार गरी हत्या गरिएका पर्वतका हरि बहादुर जीसीका बालबच्चाको शिक्षामा सहयोग पुर्याउन ७३ हजार रुपैया सहयोग मिलेको छ ।
जेवी ओलीले पोर्चुगलमा साँगीतिक साँझ कार्यक्रम आयोजना गरी सहयोग संकलन गरेको हो । एनआरएन पोर्चुगलका अध्यक्ष कुबेर कार्की र पुर्व आईसिसी सदस्य सूर्य हमालले जिसिकी श्रीमती रुक्मणी खड्का जीसीलाई रकम हस्तान्तरण गरेका थिए ।
झण्डै दुईमहिना अगाडि पोर्चुगलको राजधानी लिस्वोनमा पर्वत जिल्लाको मल्लाज घर भएका हरि बहादुर जिसीको हत्या भएको थियो । उनलाई धादिङ घर भएका अर्जुन सापकोटाले छुरा हानेका थिए । छुरा प्रहारबाट जिसीका भार्इ ओम जिसी पनि गम्भिर घाइते भएका थिए । राजधानी लिस्वोनको क्याम्पे पिकान्तेस्थित सडकमा उनीमाथी छुरा प्रहार भएको थियो ।
पोर्चुगलको राजधानी लिस्वनको क्याम्पो पिकनो नजिक रहेको चाईनिज रेष्टुरेण्टमा मृतक जिसीका भाई ओम जिसी कार्यरत थिए । झण्डै आधा दर्जन नेपालीले काम गर्ने उक्त रेष्टुरेण्टमा अर्जुन सापकोटाले भाडा माझ्ने काम गदैं आएका थिए ।
साहुले काम मन नपरेको भनेर निकालिएको भनिएपनि सापकोटा ३ दिनअघि मृतक जिसीका भाई ओमसँगको बिवादका कारण कामबाट निकालिएका थिए । सोही कारण प्रतिसोध साध्ने नियतले मृतकका भाईलाई आक्रमण गर्ने नियतले पुगेका सापकोटाले सगै रहेका दाजुभाईमाथी नै अन्धधुन्ध धारिलो हतियार प्रहार गरेका थिए ।
पर्वत मल्लाजका हरि बहादुर जिसी ५ बर्षअघि पोर्चुगल गएका हुन । नेपालमा कानुन बिषयमा स्नातक गरेका जिसी आर्थिक समस्याका कारण केहि समय वेल्जियम बसेर उनि पोर्चुगल गएका थिए । पोर्चुगलमै बसेर त्यहीको स्थाई बसोबासको अनुमतिपछि अहिले श्रीमति र एकछोरी समेत लगिसकेको थिए । सामान्य आर्थिक अवस्थाका जिसीका ३ भाई मध्ये मृतक हरि बहादुर जिसी जेठा र घाईते ओम जिसी कान्छा हुन ।