भिसा नियममा कडाइसँगै बेलायतमा शरणार्थी बक्यौता ५६ प्रतिशतले घट्यो, होटेल प्रयोगमा पनि उल्लेख्य गिरावट
प्रकाशित मिति : ११ भदौ २०८३, बिहिबार
Photo: Nomadic Julien / Unsplash
संयुक्त अधिराज्यको होम अफिसले सार्वजनिक गरेको पछिल्लो १२ महिनाको अध्यागमन तथ्याङ्क अनुसार बेलायत आउने भिसा, शरणार्थी आवेदन र साना डुङ्गामार्फत हुने अवैध आगमनको सङ्ख्यामा उल्लेख्य गिरावट आएको छ।
गृह मन्त्रालयका अनुसार यस अवधिमा बेलायतले कुल २,३५,००० वर्किङ भिसा, ३,८३,००० अध्ययन भिसा र ५८,००० पारिवारिक भिसा जारी गरेको छ। अघिल्लो वर्षको तुलनामा वर्किङ भिसामा १८ प्रतिशत, अध्ययन भिसामा ११ प्रतिशत र पारिवारिक भिसामा १९ प्रतिशतले कमी आएको हो। भिसा सम्बन्धी नियमहरूमा गरिएको कडाइका कारण यो गिरावट आएको विश्लेषण गरिएको छ।
यसैगरी, इङ्लिस च्यानल पार गरेर साना डुङ्गामार्फत बेलायत प्रवेश गर्नेहरूको सङ्ख्या ३३,००० पुगेको छ, जुन अघिल्लो वर्षको तुलनामा २३ प्रतिशतले कम हो। शरणका लागि आवेदन दिनेहरूको सङ्ख्या पनि २१ प्रतिशतले घटेर ८६,००० मा सीमित भएको छ।
प्रारम्भिक शरणार्थी आवेदनहरूको फछ्र्यौट तीव्र पारिएसँगै होटेलहरूमा राखिने शरणार्थीहरूको सङ्ख्यामा ठूलो गिरावट आएको छ। जुन २०२६ सम्मको तथ्याङ्क अनुसार १६,०२१ शरणार्थी मात्र होटेलमा बसिरहेका छन्, जुन अघिल्लो वर्षको तुलनामा ५० प्रतिशतले कम हो। बेलायतका अधिकांश स्थानीय निकायहरूमा होटेलको प्रयोग घटेको वा शून्यमा झरेको छ।
त्यस्तै, निर्णय पर्खिरहेका शरणार्थी आवेदनहरूको बाँकी बक्यौता ५६ प्रतिशतले घटेर ४०,००० मा झरेको छ, जुन जुन २०१९ पछिकै सबैभन्दा न्यून विन्दु हो। यद्यपि, अक्सफोर्ड विश्वविद्यालयको ‘माइग्रेसन अब्जर्भेटरी’का अनुसार गृह मन्त्रालयले आवेदनको निर्णय चाँडो गरे पनि अहिले मुख्य चुनौती अदालतहरूमा परेको पुनरावेदन सुल्झाउनु रहेको छ।
तथ्याङ्क अनुसार बेलायती नागरिकताका लागि आवेदन दिनेहरूको सङ्ख्या भने १७ प्रतिशतले बढेर ३,१५,००० पुगेको छ। गैर-युरोपेली संघ क्षेत्रबाट आएका आप्रवासीहरूको सङ्ख्या बढेकाले नागरिकता आवेदनमा वृद्धि देखिएको माइग्रेसन अब्जर्भेटरीले जनाएको छ।
गृहसचिव शबाना महमुदले यी तथ्याङ्कहरूले सरकारले “सिमानामा नियन्त्रण र अध्यागमन प्रणालीमा निष्पक्षता पुनःस्थापना गरिरहेको” देखाएको बताएकी छन्। यद्यपि, अवैध आगमन पूर्ण रूपमा रोक्न र कानुनी प्रक्रियालाई थप व्यवस्थित बनाउन अझै धेरै काम गर्न बाँकी रहेको उनले उल्लेख गरिन्।