नेभाडाको डढेलो नियन्त्रणबाहिर: १५ हजार एकड ध्वस्त, ९० हजार बासिन्दालाई सुरक्षित स्थानमा सर्न आग्रह
प्रकाशित मिति : ७ भदौ २०८३, आइतबार
Photo: Matt Howard/ Unsplash
अमेरिकाको नेभाडा राज्य स्थित सिएरा फुटहिल्सबाट सुरु भएको ‘हक’ डढेलो तीव्र गतिमा फैलिएर १५,००० एकड भन्दा बढी क्षेत्रमा फैलिएको छ। डढेलो रेनो सहरको केन्द्र भागतिर अघि बढेपछि अधिकारीहरूले करिब ९०,००० बासिन्दालाई स्थानान्तरण हुन आग्रह गरेका छन्।
ट्रकी मेडोज फायर एन्ड रेस्क्युका अनुसार तेज हावा, कम आर्द्रता र सुक्खा वनस्पतिले गर्दा डढेलो भीषण रूपमा फैलिएर युनिभर्सिटी अफ नेभाडाको क्याम्पस नजिकै पुगेको छ। प्रभावितहरू मध्ये ४२,००० जनालाई तुरुन्तै घर छाड्न ‘कडा आदेश’ दिइएको छ भने बाँकी ४५,००० जनालाई जुनसुकै बेला घर छाड्न तयार रहने गरी चेतावनी क्षेत्रमा राखिएको छ।
रेनोकी मेयर हिलारी शिभले भनिन्, “यदि तपाईंलाई घर छाड्न भनिएको छ भने कृपया ढिलाइ नगर्नुहोस्। धेरै भवनहरू नष्ट भइसकेका छन्। भवनभन्दा तपाईंको जीवन धेरै महत्त्वपूर्ण छ।”
नेभाडाका गभर्नर जो लोम्बार्डोले वाशो काउन्टीमा आपत्कालीन अवस्थाको घोषणा गर्दै ‘नेभाडा नेसनल गार्ड’ परिचालन गरेका छन्। डढेलो नियन्त्रण गर्न हेलिकप्टर र करिब ४०० जना सुरक्षाकर्मी तथा उद्धारकर्मीहरू खटाइएको छ। डढेलोका कारण तीन जना नागरिक र तीन जना उद्धारकर्मी घाइते भएका छन्।
अधिकारीहरूले डढेलो मानवीय कारणले सुरु भएको पुष्टि गरे तापनि यसको वास्तविक कारणबारे अनुसन्धान भइरहेको जनाएका छन्। आगलागीका कारण १०,००० भन्दा बढी घर र व्यवसायहरूमा विद्युत् सेवा अवरुद्ध भएको छ भने प्रमुख राजमार्ग युएस रूट ३९५का केही भागहरू बन्द गरिएका छन्।