अमेरिकी जस्टिस डिपार्टमेन्टद्वारा सेनालाई सीमा क्षेत्रमा आप्रवासी नियन्त्रणका लागि थप अधिकार प्रदान
प्रकाशित मिति : २९ श्रावण २०८३, शुक्रबार
Photo: Levi Meir Clancy/ Unsplash
अमेरिकी राष्ट्रपति डोनाल्ड ट्रम्पको दक्षिणी सीमा नियन्त्रण अभियान अन्तर्गत अमेरिकी जस्टिस डिपार्टमेन्टले सेनालाई रक्षा मन्त्रालयको नियन्त्रणमा रहेका क्षेत्रमा घुसपैठ गर्ने आप्रवासीहरूलाई हिरासतमा लिन थप फराकिलो अधिकार दिएको छ।
जस्टिस डिपार्टमेन्टको ‘अफिस अफ लीगल काउन्सिल’ ले जारी गरेको कानूनी राय अनुसार, ट्रम्प प्रशासनले अवैध आप्रवासन रोक्न अमेरिका-मेक्सिको सीमा नजिकका ठूला भूभागलाई ‘राष्ट्रिय रक्षा क्षेत्र’ घोषणा गरेको छ।
अमेरिकाको ‘पोसे कोमिटाटस एक्ट’ ले सेनालाई घरेलु भूभागमा कानूनी कारबाही गर्न प्रतिबन्ध लगाए तापनि यी तोकिएका सुरक्षा क्षेत्र सर्वसाधारणका लागि बन्द गरिएकाले सेनाले घुसपैठ गर्नेहरूलाई नियन्त्रणमा लिन पाउने व्यवस्था गरिएको छ। शुक्रबार जारी नयाँ राय अनुसार, यदि कुनै व्यक्ति राष्ट्रिय रक्षा क्षेत्रबाट बाहिर निस्कन खोज्छ भने पनि सैन्य कर्मचारीले उसलाई पक्राउ गर्न सक्नेछन्।
सहायक उप-महान्यायाधिवक्ता विलियम हाइडले आफ्नो रायमा भनेका छन्, “सुरक्षा क्षेत्रभन्दा बाहिर घुसपैठिहरूलाई पक्राउ गर्न सैन्य कर्मचारीको प्रयोग हुनुले पोसे कोमिटाटस एक्टको उल्लङ्घन हुँदैन।”
ट्रम्प प्रशासनले हालसम्म एरिजोना, क्यालिफोर्निया, न्यु मेक्सिको र टेक्सासका ६ वटा स्थानलाई राष्ट्रिय रक्षा क्षेत्र घोषणा गरिसकेको छ। सीमा क्षेत्रमा सैन्य उपस्थिति बढाउने नीति अन्तर्गत हालसम्म २०,००० भन्दा बढी सैनिक तैनाथ भइसकेका छन् भने संयुक्त कार्यदलका ८,००० सैनिक कार्यरत छन्।
प्रशासनको कडा नीतिको परिणामस्वरूप अवैध सीमा पार गर्नेहरूको संख्यामा उल्लेख्य गिरावट आएको छ। आर्थिक वर्ष २०२३ र २०२४ मा क्रमशः २० लाख र १५ लाख रहेको आप्रवासी पक्राउ संख्या आर्थिक वर्ष २०२५ मा घटेर २ लाख ४० हजारमा सीमित भएको थियो।