अमेरिकी सीमामा कडाइ: ७१ हजार पक्राउ, २५० जनामाथि आपराधिक मुद्दा
प्रकाशित मिति : १६ श्रावण २०८३, शनिबार
Photo: Bob Wells /Unsplash
अमेरिकाको ‘बोर्डर गस्ती’ अन्तर्गतको एल पासो क्षेत्रले दक्षिण-पश्चिम सीमा क्षेत्रमा हवाई निगरानी बढाउँदै “सीमा पूर्ण रूपमा बन्द छ” भन्ने सन्देशलाई सामाजिक सञ्जालमार्फत पुनः दोहोर्याएको छ।
अमेरिकी भन्सार तथा सीमा सुरक्षाको पछिल्लो तथ्याङ्क अनुसार, चालु आर्थिक वर्षको जुनसम्ममा प्रवेशविन्दु बाहिरबाट दक्षिण-पश्चिम सीमा पार गर्न खोज्ने ७१,५८० जना पक्राउ परेका छन्। यसमध्ये १२,७६२ जना एल पासो क्षेत्रबाट मात्रै नियन्त्रणमा लिइएका हुन्। तथ्याङ्क अनुसार सबैभन्दा बढी पक्राउ ‘रियो ग्रान्डे भ्याली’मा र त्यसपछि ‘टुसन’ एवं ‘एल पासो’मा भएको छ।
यसैबीच, पश्चिम टेक्सासको सङ्घीय सरकारी वकिलहरूले अध्यागमन उल्लङ्घन सम्बन्धी २५० वटा नयाँ आपराधिक मुद्दा दर्ता गरेका छन्। जसमध्ये अधिकांश गिरफ्तारी एल पासो र फोर्ट ह्यानकक क्षेत्रसँग सम्बन्धित छन्। अमेरिकी सरकारी वकिलको कार्यालयका अनुसार पक्राउ परेका कतिपय व्यक्तिहरू यसअघि पनि गम्भीर अपराध, यौनजन्य कसुर, चोरी तथा मादक पदार्थ सेवन गरी सवारी चलाएको घटनामा दोषी ठहर भइसकेका व्यक्ति हुन्।
पक्राउ परेकामध्ये फोर्ट ह्यानकक क्षेत्रबाट समातिएका दुई जना मेक्सिकन नागरिक यसअघि नै देशनिकाला भइसकेका व्यक्तिहरू हुन्। सन् २००८ मा बलात्कार प्रयासको गम्भीर अभियोगमा सजाय भोगेका मानुएल साञ्चेज-साञ्चेजलाई पुनः गैरकानुनी प्रवेशको अभियोग लगाइएको छ। त्यसैगरी, तीन पटकसम्म देशनिकाला भइसकेका रेजिनाल्डो कार्डोना-कार्डोनालाई पनि पुनः पक्राउ गरिएको छ।
यसबाहेक ट्र्याभिस काउन्टी र इगल पास क्षेत्रबाट पनि उल्लेख्य सङ्ख्यामा मानिसहरू पक्राउ परेका छन्। तथ्याङ्क अनुसार सबैभन्दा धेरै गैरकानुनी प्रवेश र पुनः प्रवेश (२,९४६) का कारण पक्राउ परेका छन्। त्यसपछि मादक पदार्थ सेवन गरी गाडी चलाउने (१,२७६), लागूऔषध ओसारपसार (५९८) र घरेलु हिंसा वा कुटपिट (५०१) का घटनामा गिरफ्तारी भएको छ।
गैरकानुनी प्रवेशलाई निरुत्साहित गर्ने उद्देश्यले सीमा गस्ती टोलीले आधिकारिक फेसबुक पेजमा एक भिडियो पोस्ट गरेको छ। उक्त भिडियोमा ड्रोन र हेलिकप्टरमा जडान गरिएका ‘इन्फ्रारेड’ क्यामेराको मद्दतले रातको समयमा सीमा क्षेत्रमा हुने गतिविधि निगरानी गरी जमिनमा खटिएका सुरक्षाकर्मीलाई निर्देशन दिइएको दृश्य देखाइएको छ।