अमेरिकामा सरकारी रकम दुरुपयोग र अध्यागमन ठगी प्रकरणमा नेशनल गार्डका मेजर दोषी ठहर
प्रकाशित मिति : १३ श्रावण २०८३, बुधबार
अमेरिकी राज्य भर्जिनियाको आर्लिंगटन निवासी डि.सी. नेशनल गार्डका ४० वर्षीय मेजर कोलिन एल. वेल्चले अमेरिकी जिल्ला अदालतमा गैरकानुनी रूपमा विदेशी नागरिकलाई अमेरिका प्रवेश गराएको, बस्न प्रोत्साहन गरेको र करिब ५४,००० अमेरिकी डलर सरकारी रकम ठगी गरेको अभियोगमा आफ्नो दोष स्वीकार गरेका छन्। अमेरिकी सरकारी वकिल जेनिन फेरिस पिरोले यस कुराको जानकारी दिएकी हुन्।
वेल्चले अमेरिकी जिल्ला न्यायाधीश अमिर एच. अलिको समक्ष आफ्नो अपराध स्वीकार गरेका हुन्। सम्झौताको एक भागको रूपमा, वेल्च ५४,००० डलर रकम अमेरिकी सरकारलाई फिर्ता गर्न सहमत भएका छन्। न्यायाधीश अलिले आगामी डिसेम्बर ३, २०२६ का लागि उनको सजाय निर्धारण गर्ने मिति तोकेका छन्।
अदालती कागजात अनुसार, वेल्च नेशनल गार्डका एक अधिकारी हुन्, जसले यसअघि अलास्का र डि.सी. नेशनल गार्डमा सेवा गरिसकेका छन् र अफगानिस्तान तथा जिबुटीमा पनि खटिएका थिए। सन् २०१९ मा, मङ्गोलियाको उलानबातारस्थित अमेरिकी दूतावासमा कार्यरत रहँदा, पहिले नै विवाहित भए तापनि उनले एक मङ्गोलियन महिलासँग प्रेम सम्बन्ध सुरु गरेका थिए।
वेल्चले आफू डिभोर्स भइसकेको देखाउन नक्कली सम्बन्ध विच्छेद पत्र बनाएर ती मङ्गोलियन महिलालाई विश्वास दिलाए र सन् २०२२ मा आफ्नी जेठी पत्नीसँग कानुनी रूपमा वैवाहिक सम्बन्ध कायम छँदै मङ्गोलियामा उनीसँग विवाह गरे। त्यसपछि, सन् २०२४ मा वेल्चले ती मङ्गोलियन महिला र उनकी नाबालक छोरीलाई पर्यटक भिसामार्फत अमेरिका ल्याए। अक्टोबर २०२४ मा उनले जेठी पत्नीसँग सम्बन्ध विच्छेद नगरीकनै भर्जिनियामा तिनै मङ्गोलियन महिलासँग दोस्रो पटक विवाह गरे।
सन् २०२५ को सुरुतिर ती महिला र उनकी छोरीको पर्यटक भिसाको अवधि सकिएपछि पनि वेल्चले जानीजानी उनीहरूलाई आर्थिक सहयोग र बसोबासको व्यवस्था मिलाइरहेका थिए। जब ती मङ्गोलियन महिलाले आफ्नो अध्यागमन अवस्था बारे सोधिन्, वेल्चले नक्कली स्थायी बसोबास स्वीकृति पत्र, सामाजिक सुरक्षा कार्ड र सैन्य स्वास्थ्य सुविधासम्बन्धी नक्कली पत्र बनाएर नागरिकताको प्रक्रिया अगाडि बढिरहेको भन्दै उनलाई ढाँटे। तीमध्ये कुनै पनि कागजात कुनै सरकारी निकायमा दर्ता गरिएका थिएनन्।
यसका अलावा, वेल्चले आफ्नो सरकारी भ्रमण कार्डको दुरुपयोग गरी झूटा ट्राभल भौचर र कहिल्यै नगरेका होटल तथा भाडाका गाडीका नक्कली बिल पेस गरे। साथै, उनले उक्त कार्ड बिना अनुमति व्यक्तिगत भ्रमण र ती महिला तथा उनकी छोरीको खर्च जुटाउन प्रयोग गरी करिब ५४,००० डलर गैरकानुनी रूपमा खर्च गरेको पाइएको छ।
यस प्रकरणको अनुसन्धान अमेरिकी सेनाको अपराध अनुसन्धान डिभिजनले अमेरिकी सरकारी वकिलको कार्यालयको आपराधिक अनुसन्धान इकाईको सहयोगमा गरेको थियो।
यो मुद्दाको बहस अमेरिकी सरकारी वकिलको कार्यालय को ठगी, सार्वजनिक भ्रष्टाचार तथा नागरिक अधिकार शाखाका सहायक अमेरिकी वकिल एस. बाबु काजाले गरिरहेका छन्।
अप्रिल ७, २०२६ मा अमेरिकी जस्टिस डिपार्टमेन्टले ‘राष्ट्रिय ठगी प्रवर्तन डिभिजन’ स्थापनाको घोषणा गरेको थियो। करदाताको रकम चोरी वा दुरुपयोग गर्नेहरूमाथि कडा अनुसन्धान र कारबाही गर्नु यस डिभिजनको मुख्य उद्देश्य हो। ठगी नियन्त्रण सम्बन्धी जस्टिस डिपार्टमेन्टले यो प्रयास, उपराष्ट्रपति जे.डी. भान्सको अध्यक्षतामा गठित राष्ट्रपति ट्रम्पको ‘ठगी नियन्त्रण कार्यदल’ अन्तर्गत सञ्चालित सरकारी अभियानको एक भाग हो।