फ्लोरिडामा देश निकालाको आदेशमा तीव्र वृद्धि: जुन महिनामा मात्रै ५,००० भन्दा बढी निष्कासन आदेश जारी
प्रकाशित मिति : ७ श्रावण २०८३, बिहिबार
फोटो : टिन्गी इन्जुरी ल फर्म
ट्रान्ज्याक्सनल रेकर्ड्स एक्सेस क्लियरिङहाउसले सार्वजनिक गरेको प्रतिवेदन अनुसार, फ्लोरिडाका अध्यागमन अदालतमा जुन महिनामा देश निकालाको आदेशमा ठूलो वृद्धि भएको छ। न्यायाधीशहरूले जुन महिनामा मात्र ५,४१५ वटा निष्कासन आदेश जारी गरेका छन्, जुन मार्च महिनाको तुलनामा १८ प्रतिशतले बढी हो।
सिरैक्युज विश्वविद्यालयको गैर-नाफामूलक संस्था टीआरएसीका अनुसार, जुन महिनामा देशभर अध्यागमन अदालतका १,००,७७३ मुद्दाहरू किनारा लाग्दा देश निकालाको आदेश कुल ७८,८८२ पुगेको छ। सो महिना फैसला भएका कुल मुद्दामध्ये करिब ७८ प्रतिशत केसहरूमा निष्कासनकै आदेश जारी भएको प्रतिवेदनमा उल्लेख छ।
फ्लोरिडामा देखिएको यो वृद्धि अमेरिकाभरि नै भइरहेको उतारचढावको एक हिस्सा हो। इलिनोय र टेक्सस जस्ता राज्यहरूमा यस्ता आदेशहरू ह्वात्तै बढेका छन् भने क्यालिफोर्निया र एरिजोना जस्ता राज्यहरूमा भने घटेको पाइएको छ। तथ्याङ्क अनुसार फैसला सुनाइएका धेरैजसो व्यक्तिहरू अदालतको सुनुवाइमा उपस्थित थिएनन्; दुई-तिहाइभन्दा बढी मानिसहरूको अनुपस्थितिमै न्यायाधीशहरूले देश निकालाको आदेश जारी गरेका थिए।
जुनको अन्त्यसम्ममा अध्यागमन अदालतहरूमा अड्किएका मुद्दाहरूको सङ्ख्या करिब ३२ लाख पुगेको छ। देश निकालाको आदेश पाउनेहरूमध्ये जम्मा २१.५ प्रतिशत व्यक्तिहरूसँग मात्र कानुनी वकिलको सुविधा उपलब्ध थियो। अदालतबाट छुट वा राहत पाउने केसहरूको प्रतिशत भने अझै पनि निकै थोरै रहेको संस्थाले जनाएको छ।
जुन महिनामा देश निकालाको दर बढ्नुका साथै फ्लोरिडाको एभरग्लेड्सस्थित एउटा दुर्गम धावनमार्गमा बनाइएको विवादित हिरासत केन्द्र, जसलाई “एलिगेटर अल्काट्राज” उपनाम दिइएको थियो, पुन: चर्चामा आयो। त्यहाँको फितलो अनुगमन र कमजोर सुविधालाई लिएर आप्रवासी अधिकारकर्मीहरूले कडा आलोचना गर्दै आएका थिए। एम्नेस्टी इन्टरनेसनलको प्रतिवेदन अनुसार त्यहाँ राखिएका मानिसहरूले फोहोर वातावरण, सीमित स्वास्थ्य सेवा र वकिलहरूसँगको सम्पर्कमा प्रतिबन्ध जस्ता समस्याहरू भोग्नुपरेको थियो।
व्यापक विरोधका बिच फ्लोरिडाका गभर्नर रोन डिसेन्टिसले जुन २५ मा उक्त हिरासत केन्द्र बन्द गर्ने घोषणा गरे। आँधीबेहरीको सिजन नजिकिएकाले अस्थायी रूपमा बनाइएको उक्त केन्द्रबाट थुनामा रहेकाहरूलाई अन्य स्थानमा सारिएको उनले बताए। तर, यसरी अकस्मात स्थानान्तरण गर्दा थुनिएका मानिसहरू कहाँ छन् भनेर उनीहरूका परिवार र वकिलहरूले दिनौंसम्म पत्ता लगाउन धौ-धौ परेको अधिकारकर्मीहरूको भनाइ छ।
अध्यागमनसम्बन्धी मुद्दाहरूको चापलाई कसरी व्यवस्थापन गर्ने भन्ने विषयमा फ्लोरिडाका अधिकारीहरू र नागरिक अधिकार समूहहरूबिच तीव्र मतभेद देखिएको छ। अधिकारकर्मीहरूले कानुनी सहायता र अनुगमन बढाउन माग गरिरहेका छन् भने सरकारी अधिकारीहरूले सीमा र आप्रवासन नियन्त्रणका लागि कडा कदम आवश्यक रहेको दाबी गर्दै आएका छन्।