फेरि बढ्यो पेट्रोलियम पदार्थको मूल्य


प्रकाशित मिति : कार्तिक १५, २०७४ बुधबार

१५ कात्तिक, काठमाडौं । नेपाल आयल निगमले पेट्रोललियम पदार्थको मूल्य बढाएको छ । निगमले बुधबार राति १२ बजेदेखि लागू हुने गरी, पेट्रोल, डिजेल, मट्टितेल र एलपी ग्यासको मूल्य बढाएको हो ।

अब नयाँ मूल्यअनुसार पट्रोल प्रतिलिटर १०० रुपैयाँमा पाइने आयल निगमका प्रवक्ता वीरेन्द्र गोइतले जानकारी दिए ।

यस्तै मट्टितेल र डिजेल लिटरको ७५ रुपैयाँ ५० पैसा कायम भएको छ । एलपी ग्यासको मूल्य पनि बढाइएको छ । अब ग्यास प्रतिसिलिन्डर १३ सय ५० रुपैयाँ पर्ने प्रवक्ता गोइतले जानकारी दिए ।

तेलको मूल्य अन्तर्राष्ट्रिय बजारमा बढेपछि भारतीय आयल कर्पोरशेनले तेलको मूल्य बढाएर आयल निगमलाई पठाएको थियो ।

त्यसैका आधारमा निगमले १५ दिनमा २२ करोड घाटा बेहोर्नुपर्ने भएपछि मूल्य समायोजन गरिएको निगमका प्रवक्ताले बताए । आज गरिएको मूल्य समायोजनबाट निगमलाई पाक्षिक १ करोड ९७ लाख फाइदा हुनेछ ।

आज बढाएको मूल्यअनुसार निगमलाई पेट्रोलमा लिटरमा ५।५० पैसा र मट्टितेलमा १६ रुपैयाँ २ पैसा फाइदा छ । डिजेलमा ७५ पैसा र ग्यासमा प्रतिसिलिन्डर २१५ रुपैयाँ नोक्सान रहेको वीरेन्द्रले जानकारी दिए ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com