बेलायतमा सामाजिक सञ्जालमाथि प्रतिबन्ध:किशोर–किशोरी आक्रोशित
प्रकाशित मिति : २ असार २०८३, मंगलबार
बेलायत सरकारले १६ वर्षभन्दा कम उमेरका बालबालिकालाई सामाजिक सञ्जाल प्रयोग गर्न प्रतिबन्ध लगाउने निर्णय गरेपछि त्यहाँका किशोर–किशोरीहरूले असन्तुष्टि जनाएका छन्। कतिपयले यसलाई बालबालिकाको सुरक्षाका लागि आवश्यक कदम भनेका छन् भने धेरैले आफ्नो भविष्य, सिर्जनशीलता र अवसरमाथि प्रहार भएको बताएका छन्।
१५ वर्षीय गायक तथा नर्तक जियाम स्टुअर्टले आफूले सानैदेखि सामाजिक सञ्जालका लागि भिडियो बनाउँदै आएको बताए। बाल्यकालमा विदेशमा रहँदा परिवार र साथीभाइका लागि रमाइला भिडियो बनाउने उनको रुचि बिस्तारै भविष्यको सम्भावित पेसामा रूपान्तरण भएको छ।
उनका अनुसार सामाजिक सञ्जाल नभएको भए उनी अहिलेको स्थानमा पुग्न सक्ने थिएनन्। उनी नियमित रूपमा चर्चित गीतका कभर, आफ्नै मौलिक सङ्गीतका अंश तथा नृत्यका भिडियोहरू सामाजिक सञ्जालमा पोस्ट गर्छन्।
जियामको विचारमा सामाजिक सञ्जाल कलाकारहरूका लागि आफ्नो प्रतिभा प्रदर्शन गर्ने, दर्शकसँग जोडिने र कार्यक्रमका टिकट बिक्री गर्ने महत्त्वपूर्ण माध्यम बनेको छ। “सामाजिक सञ्जाल नभएको भए म अहिले जे गरिरहेको छु, त्यो गर्न सक्ने थिइनँ,” उनले भने।
यद्यपि, सामाजिक सञ्जालका आलोचकहरू भने बालबालिकालाई हानिकारक सामग्री, लत लाग्ने एल्गोरिदम, अनलाइन शिकारी (प्रिडेटर्स) र साइबर बुलिङबाट जोगाउन प्रतिबन्ध आवश्यक रहेको बताउँछन्।
बेलायती प्रधानमन्त्री किर स्टार्मरले प्रतिबन्धको घोषणा गर्दै बालबालिकाको सुरक्षा र खुसीमा कुनै सम्झौता गर्न तयार नभएकाले यो कदम चाल्नुपरेको बताए। उनले यो निर्णयले बालबालिकालाई अझ सुरक्षित र स्वतन्त्र वातावरणमा हुर्कने अवसर दिने विश्वास व्यक्त गरे।
प्रतिबन्धको पक्ष र विपक्षमा बहस चलिरहेका बेला सामाजिक सञ्जालमार्फत १ लाखभन्दा बढी फलोअर बनाएका १६ वर्षीय ब्युटी इन्फ्लुएन्सर ह्यारी सटेलले सामाजिक सञ्जालको सकारात्मक र नकारात्मक दुवै पक्ष अनुभव गरेको बताए।
समलिङ्गी पहिचान सार्वजनिक गरेपछि आफूले धेरै घृणायुक्त टिप्पणी र आलोचना सामना गर्नुपरेको उनले बताए। तर, सामाजिक सञ्जालले आफूजस्ता किशोर–किशोरीहरूलाई आत्मविश्वास दिने र आफ्नो पहिचान स्वीकार गर्न मद्दत गरेको उनको अनुभव छ।
अर्कातर्फ, माइलीकी आमा भिक्टोरियाले भने सामाजिक सञ्जाल प्रयोगको निर्णय गर्ने अधिकार अभिभावकको हातबाट खोसिएकोमा असन्तुष्टि व्यक्त गरिन्। उनका अनुसार कडा अभिभावकीय निगरानी भएमा सामाजिक सञ्जालका जोखिमहरूलाई नियन्त्रण गर्न सकिन्छ।
धेरैजसो किशोर–किशोरीहरूले सरकारले उनीहरूलाई सामाजिक सञ्जालबाट टाढा राख्नुभन्दा प्रविधि कम्पनीहरूलाई नै सुरक्षित डिजिटल वातावरण बनाउन बाध्य पार्नुपर्ने सुझाव दिएका छन्।