डनका लाइसेन्सप्राप्त हतियार खोस्दै प्रहरी
प्रकाशित मिति : भाद्र २९, २०७३ बुधबार
लाइसेन्सप्राप्त हतियार आपराधिक गतिविधिमा प्रयोग हुन थालेपछि प्रशासनले हतियारको लाइसेन्स रद्द गर्न थालेको छ । प्रहरीको सिफारिसमा जिल्ला प्रशासन कार्यालयले गुन्डागर्दीमा संलग्नको लाइसेन्सप्राप्त हतियार धमाधम खोस्न थालेको हो । ललितपुर प्रशासनले गत महिना पक्राउ परेका वीरेन्द्र महर्जनको हतियारको लाइसेन्स रद्द गरेको छ । गुन्डागर्दीको आरोपमा गत महिना महानगरीय प्रहरी परिसर ललितपुरले उनलाई पक्राउ गरेको थियो । हतियार देखाएर उनले धम्क्याउने गरेको खुलेपछि लाइसेन्स रद्द गरिएको महानगरीय परिसर ललितपुर परिसरका एसएसपी पीताम्बर अधिकारीले बताए । उनका अनुसार हतियारको लाइसेन्स रद्द गरिएको यो पहिलोपटक हो ।
ललितपुर प्रहरीकै सिफारिसमा जिल्ला प्रशासन कार्यालय काठमाडौंले पनि दुई गुन्डा नाइकेको हतियारको लाइसेन्स रद्दको प्रक्रिया सुरु गरेको छ । विश्वक्रान्ति सिंह र प्रकाश मालीको हतियारको लाइसेन्स रद्द गर्न सिफारिस गरिएको एसएसपी पीताम्बर अधिकारीले बताए ।
२३ चैतमा पक्राउ परेका सिंह हाल जेलमा छन् । उनको साथबाट अत्याधुनिक दुई हतियार र एक सय ५६ वटा गोली बरामद भएको थियो । पिएस ६४४६४ नम्बरको सर्टगन र यान लेखिएको ३७५ बोरको राइफल उनको निवासबाट प्रहरीले बरामद गरेको थियो । माली पनि ललितपुरमा लामो समयदेखि गुन्डागर्दीमा सक्रिय व्यक्ति हुन् । केही महिनाअघि ग्याङफाइटमा पक्राउ पर्दा उनीसँग लाइसेन्सप्राप्त हतियार भएको खुलेको हो ।
सिंह र मालीले लाइसेन्सप्राप्त हतियारकै आधारमा धम्क्याउने गरेको प्रहरीले जनाएको नयाँ पत्रिकामा खबर छ । ‘उनीहरूले सरकारबाट लाइसेन्सप्राप्त हतियारकै आधारमा अपराध गर्दै आएको पाइएपछि रद्द गर्ने प्रक्रिया सुरु गरेका हौँ,’ एसएसपी अधिकारी भन्छन्, ‘लाइसेन्सप्राप्त हतियारले समेत समाजमा आतंक फैलाउने गरेको देखियो ।’
पहुँच र दबाबमा लाइसेन्स
हातहतियार तथा खरखजना ऐनमा सुरक्षा थ्रेट भएको व्यक्तिहरूलाई मात्र हतियार राख्ने लाइसेन्स दिने व्यवस्था छ । यसका लागि असल चालचलन भएको प्रहरी रिपोर्ट आवश्यक पर्छ । तर, प्रहरी र जिल्ला प्रशासनबाटै सोर्सफोर्स र दबाबका आधारमा गुन्डागर्दीमा सक्रिय व्यक्तिहरूले हतियारको लाइसेन्स पाउने गरेको स्रोत बताउँछ ।
यसरी लाइसेन्स लिनेले नै हतियार देखाएर धम्क्याउने गरेको खुल्दै आएको छ । ‘राम्रो मान्छेलाई किन हतियार राख्नुपर्यो ?’ एक प्रहरी अधिकारी भन्छन्, ‘खराब व्यक्तिहरूलाई नै हतियारको आवश्यकता पर्छ ।’ कतिपयले सिकार खेल्नसमेत हतियारको लाइसेन्स लिने गरेका छन् ।
दुई वर्षअघि पक्राउ परेका महेश सिंहको घरबाट सातवटा लाइसेन्सप्राप्त हतियार प्रहरीले बरामद गर्यो । चर्काे ब्याजदरमा पैसा लगाउने र पैसा नतिरेपछि तिनै हतियार देखाएर उनले तर्साउने गरेका थिए । तर, प्रशासनले उनको हतियारको लाइसेन्स रद्द गरेन । एकजनाले पाँचवटासम्म मात्र हतियार राख्न पाउने कानुनी प्रावधान भए पनि सातवटा राख्दासमेत उनको हतियार खोसिएको थिएन ।
