तौल घटाउन अब सुई होइन, चक्की: अमेरिकामा सफल परीक्षण, बेलायती बजारमा चाँडै आउने
प्रकाशित मिति : २९ बैशाख २०८३, मंगलबार
दैनिक खाने चक्कीले तौल नियन्त्रणमा राख्न सहयोग गर्ने एक अध्ययनले देखाएको छ। पछिल्लो अनुसन्धानका अनुसार तौल घटाउने इन्जेक्सन छोडेपछि पनि यो चक्कीको सेवनले आशाजनक नतिजा दिएको पाइएको हो।
अमेरिकामा पहिले नै उपलब्ध रहेको यो औषधि बेलायतमा पनि चाँडै बजारमा आउने सम्भावना छ। ‘ओरफोर्ग्लिप्रोन’ नामक यो चक्की एक वर्षसम्म दैनिक सेवन गर्ने बिरामीहरूले आफूले पहिले घटाएको तौलको धेरै हिस्सा पुनः नबढाएको अध्ययनले देखाएको छ। सामान्यतया ‘जीएलपी–१’ नामक तौल घटाउने इन्जेक्सन बन्द गरेपछि तौल फेरि बढ्ने जोखिम रहन्छ।
यो अनुसन्धान ‘जर्नल नेचर मेडिसिन’ मा प्रकाशित भएको हो। यस अध्ययनलाई औषधि निर्माता कम्पनी इलि लिलीले वित्तीय सहयोग गरेको थियो। यही कम्पनीले लोकप्रिय तौल घटाउने इन्जेक्सन ‘मौनजारो’ पनि उत्पादन गर्दछ।
विशेषज्ञहरूका अनुसार यो औषधि कति लामो समयसम्म सेवन गर्नुपर्ने हो भन्ने विषयमा अझै थप अनुसन्धान आवश्यक छ। कतिपय अवस्थामा जीवनभर नै उपचार जारी राख्नुपर्ने हुन सक्ने उनीहरूको भनाइ छ।
बेलायतको क्याम्ब्रिज विश्वविद्यालयमा तौल व्यवस्थापन अनुसन्धानमा संलग्न डा. मेरी स्प्रेक्लीका अनुसार, सुई लगाउनुभन्दा दैनिक चक्की खानु धेरै बिरामीका लागि सहज र आकर्षक विकल्प हुन सक्छ।
तर, उनले यसको दीर्घकालीन प्रभावबारे अझै स्पष्ट जानकारी नभएको बताइन्। उनका अनुसार यो अध्ययनले मोटोपनालाई दीर्घकालीन र पुनः दोहोरिन सक्ने रोगका रूपमा बुझ्नुपर्ने आवश्यकतालाई थप स्पष्ट पारेको छ।
ओरफोर्ग्लिप्रोनले शरीरमा प्राकृतिक रूपमा पाइने भोक कम गर्ने र लामो समयसम्म पेट भरिएको महसुस गराउने हर्मोनको नक्कल गरेर काम गर्छ। यसको प्रभाव अहिले प्रयोग भइरहेका मोटोपना नियन्त्रण गर्ने इन्जेक्सनको जस्तै हुन्छ।
अमेरिकामा यो औषधिको न्यूनतम मात्रा प्रतिमहिना करिब १४९ अमेरिकी डलरमा उपलब्ध छ, जुन केही ‘जीएलपी–१’ इन्जेक्सनको प्रतिमहिना १,००० डलरभन्दा बढी पर्ने मूल्यको तुलनामा निकै सस्तो हो। बेलायतमा यसको मूल्य कति हुने भन्ने अझै तय भएको छैन, किनकि त्यहाँ यो औषधि अझै बजारमा आइसकेको छैन।
यसैबीच, प्रतिस्पर्धी कम्पनी नोभो नोरडिस्कले बनाएको इन्जेक्सन ‘वेगोभी’ को मुखबाट खाने संस्करण अमेरिकामा स्वीकृत भइसकेको छ। बेलायतमा भने यसको स्वीकृतिको निर्णय आउन बाँकी छ।
यो अध्ययनमा अमेरिकाका ३७६ जना सहभागी थिए, जसले एक वर्षभन्दा बढी समयदेखि मौनजारो वा वेगोभी प्रयोग गरेर सफलतापूर्वक तौल घटाइसकेका थिए। पछि उनीहरूलाई इन्जेक्सन बन्द गर्न लगाएर दैनिक रूपमा ओरफोर्ग्लिप्रोन वा नक्कली औषधि (प्लेसिबो) दिइयो। सहभागीहरूलाई आफूले कुन औषधि खाइरहेको हो भन्ने जानकारी दिइएको थिएन।
एक वर्षपछिको मूल्याङ्कनमा ओरफोर्ग्लिप्रोन सेवन गर्नेहरूले पहिले घटाएको तौलको ७० प्रतिशतभन्दा बढी हिस्सा कायम राख्न सफल भए। प्लेसिबो समूहले भने ३८ देखि ५० प्रतिशतसम्म मात्र तौल कायम राख्न सकेका थिए।
औषधिको साइड इफेक्ट देखिए पनि अधिकांश हल्का प्रकृतिका थिए। वाकवाकी लाग्ने, कब्जियत वा पखाला जस्ता समस्या देखिएको अध्ययनमा उल्लेख छ। चक्की सेवन गर्ने बिरामीहरूमा रक्तचाप, रगतमा चिल्लो पदार्थ (लिपिड) र चिनीको मात्रा पनि नियन्त्रणमा रहेको देखिएको छ।
यसले दीर्घकालीन रूपमा मोटोपनासँग सम्बन्धित मुटु रोग जस्ता स्वास्थ्य जोखिम कम गर्न मद्दत पुर्याउने विश्वास अनुसन्धानमा संलग्न वैज्ञानिकहरूले व्यक्त गरेका छन्। एजेन्सीहरुको सहयोगमा