निगमको जहाजको पांग्रा सातामा दोस्रोपटक पङ्चर
प्रकाशित मिति : भाद्र २९, २०७३ बुधबार
मंगलबार अपराह्न दिल्लीबाट काठमाडौं आएको नेवानिको जहाजको टायर पड्किए पनि मानवीय तथा भौतिक क्षति भने हुन पाएन । जहाजमा परराष्ट्रमन्त्री डा. प्रकाशशरण महत पनि थिए ।
काठमाडौं अवतरण गरेपछि धावनमार्गमा गुडिरहेको जहाजको टायरमा आगो देखिएपछि ग्राउन्ड स्टाफले विमानस्थल कन्ट्रोल टावर (एटिसी)लाई जानकारी दिएका थिए । एटिसीले जानकारी दिएपछि मात्र पाइलट विजय लामाले थाहा पाएका थिए । निगमका अनुसार त्यसपछि पाइलटले जहाजमा आएको समस्याका सम्बन्धमा यात्रुलाई जानकारी गराएर धैर्य रहन आग्रह गरेका थिए ।
जहाजमा खराबी आएको सूचना पाउनेबित्तिकै विमानस्थल व्यवस्थापनले यात्रुको उद्धारका लागि सवारीसाधनहरूको व्यवस्था गरिसकेको थियो । विमानस्थल सुरक्षा बललाई तयारी अवस्थामा राखिएको थियो । तर, त्यस्तो भवितव्य भएन ।
निगमको जहाजमा एक सातामा दोस्रोपटक खराबी आएको छ । आइतबार मात्रै दिल्लीस्थित इन्दिरा गान्धी अन्तर्राष्ट्रिय विमानस्थलबाट काठमाडौंका लागि उडेको जहाजको पनि टायरमा खराबी आएपछि आकस्मिक अवतरण गर्नुपरेको थियो । सो जहाजको अहिले मर्मत भइरहेको नयाँ पत्रिकामा खबर छ ।
छानबिन समिति गठन
यसैबीच संस्कृति, पर्यटन तथा नागरिक उड्डयन मन्त्रालयले निगमका जहाजका टायरमा आएको खराबी सम्बन्धमा छानबिन गर्न समिति गठन गरेको छ । मंगलबार सहसचिव सुरेश आचार्यको संयोजकत्वमा गठित ६ सदस्यीय समितिलाई १५ दिनभित्र सत्यतथ्य पत्ता लगाई प्रतिवेदन पेस गर्ने समयसीमा दिइएको छ ।