युद्धको दबाबका बीच पनि अमेरिकी अर्थतन्त्र बलियो: अप्रिलमा थपिए १ लाख १५ हजार नयाँ जागिर
प्रकाशित मिति : २६ बैशाख २०८३, शनिबार
तस्बिर:डोकुमेरिका/अनस्प्ल्यास
अमेरिकामा अप्रिल महिनामा १ लाखभन्दा बढी नयाँ रोजगारी सिर्जना भएको छ। अमेरिकी अर्थतन्त्रले गत महिना १ लाख १५ हजार नयाँ रोजगारी थपेको हो, जुन अपेक्षाभन्दा राम्रो प्रदर्शन हो।
यद्यपि, बेरोजगारी दर भने ४.३ प्रतिशतमै स्थिर रहेको छ। युद्धको जोखिम र इन्धनको बढ्दो मूल्यका बीच पनि अमेरिकी श्रम बजारले लचकता देखाएको यसले सङ्केत गर्दछ।
अमेरिकी श्रम तथ्याङ्क विभागले सार्वजनिक गरेको विवरणअनुसार, अप्रिलमा रोजगारी वृद्धिदर मार्चको तुलनामा केही कम हुने अनुमान गरिए पनि नतिजा अपेक्षाभन्दा निकै राम्रो देखिएको हो।
मार्च महिनाको संशोधित तथ्याङ्कअनुसार १ लाख ८५ हजार रोजगारी सिर्जना भएको थियो। त्यतिबेला श्रमिक आन्दोलनको अन्त्य र अनुकूल मौसमका कारण रोजगारी वृद्धि भएको बताइएको थियो।
अर्थशास्त्रीहरूले अप्रिलमा करिब ६५ हजार मात्र नयाँ रोजगारी थपिने अनुमान गरेका थिए, तर वास्तविक सङ्ख्या त्यसको झन्डै दोब्बरभन्दा बढी देखिएको छ।
वृद्ध जनसङ्ख्या, आप्रवासनमा कमी तथा प्रविधिको बढ्दो प्रयोगका कारण श्रम बजार सुस्त गतिमा अघि बढिरहेको भए पनि बेरोजगारी दरमा भने परिवर्तन आएको छैन। ह्वाइट हाउसको राष्ट्रिय आर्थिक परिषद्का निर्देशक केभिन ह्यासेटले यो तथ्याङ्कलाई “अत्यन्तै उत्कृष्ट परिणाम” भन्दै प्रशंसा गरेका छन्।
उनले युद्धका कारण अर्थतन्त्रमा दबाब रहेको स्वीकार गर्दै पेट्रोलको मूल्य प्रतिग्यालेन ४ डलर ५५ सेन्ट आसपास कायम रहेको बताएका छन्।
यद्यपि, अर्थशास्त्रीहरूले मुख्य तथ्याङ्क बलियो देखिए पनि श्रम बजारभित्र केही कमजोरी रहेको चेतावनी दिएका छन्। रोजगारी वृद्धिको करिब आधा हिस्सा खुद्रा व्यापार, ढुवानी र गोदाम क्षेत्रबाट आएको हुनाले ती क्षेत्रमा सधैँ रोजगारी वृद्धि नहुन सक्ने उनीहरूको भनाइ छ।