ओक्लाहोमामा गोली चल्दा युवतीको मृत्यु, २२ जना घाइते
प्रकाशित मिति : २३ बैशाख २०८३, बुधबार
अमेरिकाको ओक्लाहोमा राज्यमा भएको गोलीकाण्डमा एक जनाको मृत्यु भएको छ भने २२ जना घाइते भएका छन्। अर्काडिया तालको किनारमा आयोजित अनुमति नलिइएको एक कार्यक्रममा गोली चल्दा उक्त हताहती भएको प्रहरीले जनाएको छ।
प्रहरीका अनुसार मृतक १८ वर्षीया युवती हुन्। अर्काडिया ताल नजिकै ठूलो सङ्ख्यामा युवा–युवतीहरू भेला भएका बेला आइतबार राति करिब ९ बजे अचानक गोली चलेको थियो।
घाइतेहरूको अवस्था सामान्यदेखि गम्भीरसम्म रहेको छ। इडमन्ड नगर प्रहरीले घटनाको अनुसन्धान भइरहेको जानकारी दिएको छ। प्रहरीले घटनाको तथ्य पुष्टि गर्ने र आवश्यक विवरणहरू सङ्कलन गर्ने कार्य भइरहेको जनाउँदै अनुसन्धानलाई “अत्यन्त गम्भीरता र सावधानीका साथ” अघि बढाइएको बताएको छ।
प्रहरीका अनुसार अँध्यारो भएपछि सुरु भएको उक्त अनधिकृत कार्यक्रमको प्रचार सामाजिक सञ्जालमार्फत गरिएको थियो। सामाजिक सञ्जालमा “आइतबारको रमाइलो” नामक कार्यक्रमको सूचना प्रवाह गरिएको पाइएको छ।
प्रहरी प्रवक्ता एमिली वार्डले यसलाई “अत्यन्त भयावह अवस्था” भनी टिप्पणी गरेकी छन्। स्थानीय सञ्चारमाध्यमका अनुसार ओक्लाहोमा नगरस्थित एउटा उपचार केन्द्रमा नौ जना र अर्को केन्द्रमा तीन जनाको उपचार भइरहेको छ। अस्पतालका प्रवक्ताले आइतबार रातिसम्म घाइतेहरूको स्वास्थ्य परीक्षण र उपचार जारी रहेको बताएका छन्।
अर्काडिया ताल एक मानव निर्मित जलाशय हो, जुन माछा मार्ने, वनभोज गर्ने र क्याम्पिङ (पाल टाँगेर बस्ने) जस्ता गतिविधिहरूका लागि लोकप्रिय मानिन्छ।